2021-ci il mayın 19-da keçirilən "Neftçi" - "Qarabağ" matçında yaşananları xatırlamamaq yumşaq dilsə desək, ölkə futboluna qarşı ciddi hörmətsizlik olar. Həmin oyunun 89-cu dəqiqəsinin tamamında vurulan qol "Neftçi"nin həm əzəli rəqibinə qalib gəlməsinə səbəb oldu, həm də 7 il həsrətini çəkdiyi çempionluğa qovuşdurdu.

Təbii ki, bu qarşılaşmanı bir qədər sonra start fiti çalınacaq Azərbaycan derbisiylə müqayisə etmək olmaz. Həmin dövrün rəqabəti, həmin derbinin çəkisi, həmin komandaların heyəti ciddi dəyişikliyə məruz qalıb.

Necə deyərlər, indi o arxdan çox su axıb. Amma bu həmin stadionda yenidən eyni ab-havanın yaranacağına mane ola bilməz. Eyni arena, eyni Qurban Qurbanov, eyni Samir Abasov, eyni Azərbaycan derbisi. Azarkeş marağı da üst səviyyədə. Azı 8 min tərəfdar azdı bəyəm? Bəs, daha nələri eyniləşdirmək olar? Nəticəni? Çox çətin görünür...

Ümumiyyətlə, burda nəyəsə nail olmaq istəyən komanda "Neftçi" olmalıdı. Ən yaxın izləyicisini - "Araz-Naxçıvan"ı 9 xal qabaqlayan "Qarabağ" məğlub olsa, nə itirəcək? 3 xal? Ya üç mövsümdən çox qoruyub-saxladığı məğlubiyyətsizlik seriyası? Etiraf edək ki, "köhlən atlar"ı matça motivasiya edən yeganə məqam Azərbaycan derbisi adlanmasıdı. "Neftçi"nin durumu isə ortadadı. Kollektiv üçün qələbənin nə qədər vacib olduğu haqda 1001 gecə danışmaq olar. Hər halda, qələbə "ağ-qaralar" üçün dirilik suyu effekti verəcək. Samir Abasovun gedişiylə sönən rəqabət gəlişiylə közərəcək, bəlkə də stadionları ağuşuna alacaq qədər alovlanacaq. O başqa məsələ ki, bunun üçün heç-heçə də yetərli ola bilər.

Odu ki, bu gün "Neftçi" ən pis halda baxımlı oyunla yadda qalmalıdı. Mümkün qələbə isə yuxarıda bəhs etdiyim çempionluq oyunu qədər yaddaqalan, tarixi və önəmli olacaq.

KƏNAN BAHADIR