“6-lıq” sistemi o qədər də effektli deyil” – Aslan Kərimov
AFFA İcraiyyə Komitəsinin son iclasında növbəti mövsümdən premyer-liqada 12 komandanın yarışacağına qərar verildi. Amma 12 komandalı çempionatın hansı formatda keçiriləcəyi məlum deyil.
Komandaların 4 dövrədə yarışması hər birinin çempionatda 44 oyun keçirməsi deməkdi. Bunun üzərinə ölkə kubokunu, avrokubokları və yığmanı da gələndə oyun sayı 60-ı ötür. Bu isə Azərbaycan futbolunun reallıqlarında mümkünsüzdü. Alternativ variantlar kimi komandaların üç dövrədə yarışmasını və “6-lıq” sisteminin tətbiqi təklif edənlər də var. Bəs hansı variant daha yaxşıdı?
Aslan Kərimovun “Football-plus.az”a açıqlaması:
“Əslində 12 komandanın olması yaxşıdı. Yavaş-yavaş artımın olması müsbət addımdı. Amma problem ortaya çıxır ki, çempionat hansı formatda davam etsin? Düzü, “6-lıq” sistemi o qədər də effektli deyil. Bəzən mənasız oyunlar olur. Öz yerini təmin edəndən sonra hansısa komanda üçün nəticələr maraqlı olmaya bilər. 7-ci yeri tutan komandanın elitanı tərk etmək ehtimalı olmayacaq, belədə nə üçün oynayacaq? Motivasiya baxımından da o qədər yaxşı deyil. Üç dövrə oynamaq daha məntiqəuyğundu. Amma 33 oyun da azdı. Bəlkə də “Qarabağ”a bu variant sərf edir. Avrokuboklarda daim oynadığına görə. Başqa komandalar üçün isə il ərzində 33 oyun azdı, 45-50 oyun yaxşı variant olardı. Məncə, üç dövrə oynamaq daha məqsədəuyğundu”.
ƏSƏD SEYİDOV
Digər xəbərlər
