İki tovuzlu bazara gedirlər, yolda biri o birindən soruşur ki, sən bazara nə yaxşı? İkinci deyir yaxşı tut arağım var, onu satmağa gedirəm. Sual verən cox həyəcanlı şəkildə: “Öyün yıxılmasın, tut arağını satıb, bundan yaxşı nə alacaqsan ki?”

“Turan Tovuz” Otto Conun komandadan ayrıldığını elan edəndən sonra onsuz da çox populyar olan bu lətifə tam yerinə düşdü. Doğrudan da, qəribədi: avrokuboklara vəsiqəyə can atan komanda ötən mövsüm 10 qolla bombardiri olan, bu mövsüm də 4 qol, 2 məhsuldar ötürmə göstəricinə malik liderini əldən verdi. Özü də hara-hara, Liviya təmsilçisi “Əl-Mədinə”yə.

Əlbəttə, Tovuz klubunun əlində bir dəlil var: onsuz da yayda müqavilə müddəti bitəcəkdi, inda satmaq lazımdı ki, müəyyən kompensasiya ala bilək. Amma yəqin rəhbərlik onu da gözəl bilir ki, kubokda da mübarizəni dayandıran komanda mayda hədəfinə çata bilməsə, ilk yada düşən məhz Con olacaq. “Turan Tovuz” üçün meydanda canını qoyan, fədakarlıq edən, nəticə yolunda canından-qanından keçməyə hazır olan nigeriyalı. Təbii ki, Ottoya vəkillik etmək niyyətim yoxdu. Amma mənə elə gəlir ki, 2023/24 mövsümündə 10 qol vuran hücumçu yayda 1 yox, məsələn, 2 illik müqaviləni haqq edirdi.

Görünür, onda rəhbərlik nələrisə düzgün hesablamayıb, ya da danışıqların gedişində ciddi müqavimətlə üzləşib. Hər halda, başında ağıl, ayağında güc olan, avrokuboklarda çıxış etmək istəyən heç bir futbolçu “Turan Tovuz”u “Əl-Mədinə”yə dəyişməzdi. 27 yaşını ötən ay tamamlayan nigeriyalı bəlkə də istisnasız maliyyə mülahizələrinə söykənib, Ehtiram Quliyevin cəlbedici təklifləri belə onun Liviya variantını seçməsinə mane olmadı.

Nə qədər inandırıcı görünməsə də, bəlkə də Otto Joarlem Batista ilə rəqabətdən çəkindi, Kurban Berdıyevin braziliyalı hücumçuya daha çox şans verəcəyini düşündü. Hər halda, tovuzlu azarkeşlərin sevimlisi artıq Tovuzda deyil. Odu ki, məlum lətifənin sonundakı məşhur sualı – Ottonu satıb nə alacaqsız? – səsləndirmək yerinə düşmür.

Otto satıldı və getdi, meydan artıq Joarlem Batistanındı. Onun nigeriyalı fədakarı unutduracağına, tovuzlu azarkeşlərin qəlbində taxt quracağına ümid etmək istəyirəm. Baxmayaraq ki, bu çox çətin olacaq.

ORXAN