“Fənərbaxça” Talişkaya "dünya"ları verib - detallar
Qış transfer dönəminə sürətli start verən “Fənərbaxça” Dieqo Karlos və Milan Şkrinyarın ardından fanatların ürəyinə yağ kimi yayılan daha bir keçidi rəsmiləşdirdi.
Uzun müddətdi “Əl-Nəssr” ilə danışıqlar aparan İstanbul nəhəngi Anderson Talişkanı heyətinə qatmağı bacardı. Daha öncə Türkiyədə iki mövsüm “Beşiktaş”da forma geyən və hətta çempionluq sevinci də yaşayan tanınmış braziliyalı futbolçu bazar ertəsi axşam saatlarında İstanbula ayaq basdı. O, hava limanında böyük izdihamla qarşılandı. Ertəsi gün isə bu transfer klub tərəfindən rəsmən açıqlandı.
30 yaşlı futbolçu ilə ilyarımlıq müqavilə imzalandı. Talişka “sarı-lacivərdlilər”də “94” nömrəli forma ilə çıxış edəcək. “Fənər”in rəsmi açıqlamasında keçidin maliyyə detalları barədə məlumat verilmədi. Amma qeyri-rəsmi mənbələrə inansaq, “Fənər” son anda “Qalatasaray”ın da təklif göndərdiyi Talişkanı transfer edə bilmək üçün ona belə desək, dünyaları verib. Həmin “dünyalar” belə səslənir.
* “Əl-Nəssr”ə 15,5 milyon avro təzminat.
* İlyarım ərzində Talişkaya ümumilikdə 22,5 milyon avro maaş.
* Xüsusi sürücü, aşpaz, iki köməkçi.
* Ən son model lüks VİP maşın.
* Braziliyaya səhayət üçün ildə bir neçə dəfə olmaqla “biznes-klass” təyyarə bileti.
* 400 min dollar dəyərində ev kirayəsi dəstəyi.
* Uşaqların təhsil və digər ödənişləri üçün lazım olan məbləğ.
Düzdü, Talişkanın “şor-çörək” qiymətinə Türkiyəyə gələcəyi gözlənilmirdi. Çünki o zatən Səudiyyə Ərəbistanında cənnətdəki kimi yaşayır və milyonlar qazanırdı. Amma yuxarıda sadalanan şərtlər Türkiyə reallığı üçün bir qədər ağır görünür. Hərçənd yenə də qeyri-rəsmi mənbələrə inansaq, İkardi və Osimhen “Qalatasaray”da illik 10 milyon avro qazanır. Rəsmi olaraq isə onların maaşı 6 milyon avro göstərilir.
İlk açıqlamalarını “Fənər”in rəsmi kanalına verən Talişka bunları deyib:
“Deyə biləcəyim ilk kəlmə minnətdarlıqdı. Bütün bu müddət ərzində “Fənər” mənə münasibətdə çox özəl davrandı və sonda bu klubun formasını geydim. Bu, mənim üçün böyük qürurdu. Çox xoşbəxtəm, əlimdən gələnin ən yaxşısını etmək üçün motivasiyalıyam. Fanatlarımıza da mənə göstərdiyri sevgiyə görə təşəkkürümü bildirirəm. Bu komandanı dəstəkləməkdə davam etsinlər. Məncə, yetərincə yaxşı komandamız var. Bu komanda böyük uğurlar qazanmağa qadirdi. Oyunçular motivasiyalıdı. Çox gözəl şəkildə qarşılandım. Mənim üçün özəl anlar idi və bunu həmişə qəlbimdə yaşadacam. Bu klubu təmsil etmək mənim üçün böyük qürur və məsuliyyət olacaq”.
Maraqlıdı ki, “Fənərbaxça” PSJ-dən 6 aylığa icarəyə götürdüyü Şkrinyarın da keçidinin detallarını açıqlamaq istəmədi. Burda da, sadəcə, iddialara əsalanmalı olacağıq.
Həmin iddialara görə, slovakiyalının PSJ-də yarım mövsümlük maaşı olan 3,25 milyon avro “Fənər” tərəfindən ödəniləcək. İcarə haqqı və bonuslarla birlikdə bu transfer cəmi 6 ay üçün “Fənərbaxça”ya təxminən 5 milyon avroya başa gələcək.
Digər xəbərlər
