5 oyunda 16 sarı vərəqə göstərildi, nə meydandan qovulan oldu, nə də hakimlər penalti nöqtəsini göstərdi. Ümumilikdə səliqəli və nəzakətli şəraitdə keçən turla bağlı bütün təəssürat son oyunda pozuldu.

“Turan Tovuz”un uzatma dəqiqələrində vurduğu qol “Qarabağ”ın baş məşqçisi Qurban Qurbanovu özündən çıxardı. O, uzun fasilədən sonra idarəçiliyi belə sərt tənqid etdi.

Şamaxı - Zirə, İNQİLAB MƏMMƏDOV
Son oyunlarda xeyli xal itirən və toparlanmaqda çətinlik çəkən "Şamaxı" ilə bir ara yaşadığı kiçik xaosdan xilas olmağı bacaran, ardıcıl uğurlar qazanan "Zirə"nin qarşılaşması o qədər də gərgin keçmədi. Düzdü, meydan sahibləri yeri gələndə müqavimət göstərirdi. Lakin qonaqlar lazım olan qələbəni qazanmaqda çətinlik çəkmədi. Bu baxımdan İnqilab Məmmədov da özünü yormalı olmadı. Ona görə ki, komandalar aqressiv davranış sərgiləmir, özlərini daha çox vəziyyətlə barışmış kimi aparırdılar. Belədə FİFA referisi yalnız güzəştin mümkünsüz və müdaxilənin qaçılmaz olduğu epizodlarda özünü göstərir, hadisələrin axarına xələl gəlməməsinə xidmət edirdi. Qısası, İnqilab bəy şamaxılı azarkeşkərin emosionallıqdan irəli gələn təhqir və tənqidlərinə layiq deyildi. Onun bu oyunda yalnız qonaq futbolçuları sarı vərəqələrlə cəzalandırdığını da xatırladaq.

Sabah - Sumqayıt, ELÇİN MƏSİYEV
Elçin Məsiyev oyunu pis idarə etmədi. Komandaların açıq oynamasına şərait yaradan hakim yalnız bir futbolçuya sarı vərəqə göstərdi. Elçin bəyin qərarları və mövqe seçimi doğru idi. Referi “oyunun ipini əlində saxlamağa” çalışdı. Meydan sahibləri ilk dəqiqələrdən mübarizə əzmini ortaya qoysalar da, hansısa aqressivliyin şahidi olmadıq.

Araz-Naxçıvan - Neftçi, RAUF CABBAROV
Oyun gərgin mübarizə şəraitində keçmədi. Soyuqqanlıığıyla diqqəti çəkən referi futbolçulara güzəştə getmədi. Rauf bəy 5 futbolçuya sarı vərəqə göstərdi ki, bunlarım hamısı haqlı idi. Cabbarovun vəzifəsinin öhdəsindən qüsursuz gəldiyini deyə bilərik.

Qarabağ - Turan Tovuz, CAVİD CƏLİLOV
Turun mərkəzi matçı Cavid Cəlilovu ciddi tənqidlərlə üzləşdirdi. Xatırladaq ki, bu matçda "Qarabağ" hesabı açsa da, 90 və 90+4-cü dəqiqələrdə buraxdığı qollar üzündən məğlub oldu. Oyunsonrası mətbuat konfransında ədalət təmsilçisini hədəf alan Qurban Qurbanov qonaqların künc zərbəsindən sonra vurduğu qol zamanı rəqibin müdafiəçisi Faiq Hacıyevin Şahruddin Məhəmmədəliyevin qəsdən önünü kəsdiyini, Cəlilovun isə qayda pozuntusuna göz yumduğunu iddia etdi. Lakin AFFA Hakimlər Komitəsinin sədri Frank De Blekere belə düşünmür. Belçikalı mütəxəssis gündəmi zəbt edən epizod haqda danışarkən bildirib ki, "Turan Tovuz"un həmin qolu qaydalar çərçivəsindədi. Hər halda, videogörüntülərə əsaslansaq, həqiqətən qaydalar pozulmayıb. Deməli, Cavid Cəlilovu qınamaq olmaz. Azı məhz bu oyun üçün onun ədaləti layiqli təmsil etdiyini deyə bilərik. Amma bir məqam da var. Ayrı-ayrı futbolçuların qapıçıları bu şəkildə bloklaması gec-tez daha böyük qalmaqala səbəb olacaq.

Səbail – Kəpəz, ƏLİYAR AĞAYEV
6 xallıq oyunun ölkənin ən güclü referisinə tapşırılması doğru qərar idi. O da gözləntiləri doğrultdu. Hər komandadan iki futbolçuya “sarı” göstərməklə bir növ balansı qorudu. Həm Azər Bağırovun, həm də Cavid Hüseynovun onu təzyiq altında saxlamaq niyyəti güdən qışqırıqlarına və iradlarına da əhəmiyyət vermədi. Hətta bəlkə baş məşqçilərə münasibətdə daha sərt davrana bilərdi. 4-cü hakim Fərid Hacıyev də oyunboyu baş məşqçilərdən irad eşitdi.