“Kəpəz” son günlər azarkeşlərin önünə xoş xəbərlərlə çıxır. Gəncə təmsilçisi fasilənin sonunda fəallaşıb.

Belə ki, ötən həftə qərb təmsilçisi əvvəlcə “Aqua Life Qax" suları ilə anlaşdı. "Maximus" MMC ilə tərəfdaşlıq müqaviləsinə görə şirkət mövsüm ərzində klubun su təminatını həyata keçirəcək. Əsas komandanın oyun formalarında isə şirkətin loqosu əksini tapacaq. Ardından Futbolun İnkişaf Fondunun (FİF) vasitəçiliyi ilə “Kəpəz”lə “Babir” idman geyimləri markası arasında tərəfdaşlıq müqaviləsi imzalanıb. “Babir” “Kəpəz” Futbol Akademiyasını oyun geyimləri ilə təmin edəcək. Bir neçə gün öncə isə “sarı-göylər”lə Gəncə Memorial Hospital arasında tərəfdaşlıq müqaviləsi bağlanıb. Hospital mövsüm ərzində kluba tibbi xidmətlər göstərəcək.

Bir tərəfdən də klubdaxili islahatlar davam edir. Cabir İbrahimov “Kəpəz"in icraçı direktor postuna təyin olunub. "Football-plus.az" onunla əlaqə saxladı.

- Əvvəlcə yeni təyinatinızla bağlı sizi təbrik edirəm. Necə oldu ki, illər sonra yenidən bu vəzifəyə qayıtdız?
- Təbrikə görə təşəkkür edirəm. “Kəpəz” bizim doğma, sevimli klubumuzdu. Bu klubun bir parçası olmaq qürurvericidi. “Kəpəz”ə bağlı adamam. Həmişə komandanın vəziyyəti mənim üçün ön planda olub. Təyinatıma görə də rəhbərliyə minnətdaram.

- "Kəpəz"də son günlər baş verən yeniliklər hər kəsi yaxşı mənada təəccübləndirdi. Dəyişikliklər klub və gəncəlilər üçün nə vəd verir?
- Rəhbərlik klubun daha yaxşı yerlərə gəlməsi üçün əlindən gələnin ən yaxşısını etməyə çalışır. Son günlərdə imzaladığımız tərəfdaşlıq müqavilələri də işimizə dəstək olacaq. İnanıram ki, yaxın gələcəkdə daha yaxşı yeniliklərlə azarkeşlərimizi sevindirəcəyik.

- Son vaxtlar bir neçə tərəfdaşla müqavilə imzalandı. Bundan sonra klubun maliyyə durumu düzələcəkmi?
- Hər bir müqavilə işimizə dəstəkdi. Hər şeyin daha yaxşı olması üçün klubun maliyyə sponsoruna ehtiyacı var. Bu yöndə işlər davam edir.

- "Kəpəz"in növbəti mövsüm üçün hədəfi nə olacaq? Bu yeniliklərdən sonra yenə də premyer-liqada qalmaq üçün mübarizə aparacaqsız?
- Təəssüf ki, klubumuz yenə elitada qalmaq uğrunda mübarizə aparacaq. Sponsor olmadan böyük məqsədləri həyata keçirmək mümkün deyil. Ümumiyyətlə, istənilən irəliləyiş maddi dəstəkdən aslıdı.

- Mövsümün sonlarında "Kəpəz"də yaranan maddi sıxıntıdan bəzi futbolçular şikayətlənirdi. Hazırda futbolçuların maaşları tam ödənilibmi?
- Klubumuz sponsor dəstəyi olmadan fəaliyyət göstərir. Bəlli ünvandan gələn maliyyə hesabına klub ayaqda qalmağa çalışır. Bu günə kimi “Kəpəz” heç kimə borclu qalmayıb. Futbolçularla bağlı bütün öhdəliklər də tam yerinə yetirilib.

- Stadionla bağlı nə yeniliklər var?
- Stadionla bağlı məsələ Gənclər və İdman Nazirliyinin üzərindədi. Yaxşı olar ki, bu sualı nazirliyə ünvanlayasız. Tikinti davam edir. İnanırıq ki, növbəti mövsümdən rəqiblərimizi Gəncədə qəbul edə biləcəyik.

- Bu dəyişikliklərdən sonra "Kəpəz" akademiyası üçün hansı plan və strategiya seçilib?
- Akademiyanın rəsmi açılışı olmayıb. Mövcud vəziyyətdə maliyyə ayrılmayıb. Ona görə də planlar qurmağa imkanımız yoxdu. Yaxın günlərdə maliyyə planında dəyişiklik olarsa, həyata keçirəcəyimiz işlər özümüz üçün məlumdu. Akademiya açılmasa belə, fəaliyyətimizi günün tələbləri səviyyəsində qurmuşuq. Məşqçilərlə müntəzəm çalışırıq. Uşaq futbolunun inkişafı üçün səylərimizi davam etdiririk.

RÖYANƏ OĞUZ