Son günlərdə premyer-liqanın iki klubu baş məşqçisi ilə vidalaşıb.

Əvvəlcə “Vest Hem” Xulen Lopeteqini istefaya göndərib. 58 yaşlı mütəxəssis komandanın ambisiyalarına cavab verməməsi və hədəflərə uyğun gəlməməsi səbəbindən yola salınıb. İspaniyalı mütəxəssislə yanaşı, onun dörd köməkçisi də London klubundan ayrılıb. “Çəkicdöyənlər” dərhal yeni baş məşqçinin də adını açıqlayıb. Komanda Qrem Potterə tapşırılıb. 49 yaşlı mütəxəssislə 2,5 illik müqavilə imzalanıb. Potter sonuncu dəfə 2022/23 mövsümündə “Çelsi”ni çalışdırıb. Xatırladaq ki, “Vest Hem” 20 turdan sonra 23 xalla 14-cü pillədə qərarlaşıb.

“Everton” da baş məşqçisi Şon Dayçla yolları ayırıb. İngiltərəli mütəxəssislə yanaşı, onun dörd köməkçisi də komandadan gedib. Liverpul təmsilçisinə müvəqqəti 18 yaşadək futbolçulardan ibarət komandanın baş məşqçisi Leyton Beyns rəhbərlik edəcək.