Misli premyer-liqasında mövsümün ikinci yarısının dramatik oyunlarla yadda qalacağına şübhə yoxdu.

Ona görə ki, avrokuboklar uğrunda mübarizə aparan 5 komanda var. “Neftçi” də bu yarışa qoşulsa, hadisələrin axarı daha rəngarəng olacaq. Aşağı pillələrdə də eyni durumun şahidi ola bilərik. Düzdü, hələ ki premyer-liqada qalmaq uğrunda mübarizənin baş rollarında “Kəpəz”lə “Səbail”i görürük. Lakin futbolun sürprizlərlə zəngin olduğunu unutmamalıq. İrəliləyən həftələrdə “Şamaxı” da bu sırada ola bilər. Hətta paytaxt və ya Gəncə təmsilçisi rəqibiylə aradakı fərqi böyük ölçüdə artırmaqla 1-ci liqaya yollanacaq komandanın mövsüm bitmədən öncə bəlli olmasına şərait yarada bilər.

Göründüyü kimi, ehtimallar çoxdu. Belədə bütün komandalar qış fasiləsindən maksimum istifadə etməlidi, xüsusilə də “Səbail”. Bayıl təmsilçisi təkcə sonuncu pillədə qərarlaşdığına görə təhlükə altında deyil. Məhz bu məqamın səbəblərini araşdıranda xeyli çatışmazlığın varlığını və həlli yolunda ciddi addımların atılmadığını görürük. Təbii ki, başlıca problem heyətlə bağlıdı. “Dənizçilər” Şahin Diniyevin istefasından sonra baş məşqçi postuna gətirilən Cavid Hüseynovun rəhbərliyi altında keçirdiyi 6 oyunun 2-də heç-heçə edib, 4-də uduzub. Bu azmış kimi, fəallığıyla seçilən legionerlər, daha doğrusu, Qorka Laruçça, Madi Queta və Ayman Bouali əvvəlki formasını itirib. Xüsusilə əvvəlki Laruççadan əsər-əlamət qalmayıb.

Xatırlayırsızsa, baş məşqçinin bu yöndə görmək istədiyi tədbirlər də fayda vermədi. Mütəxəssis sistemləşmiş kollektiv araya-ərsəyə gətirmək üçün əvvəl 4-1-4-1, ardınca 4-2-3-1 düzülüşünü sınaqdan keçirsə də, arzulanan nəticə hasil olmadı.

İndi azarkeşlər haqlı olaraq gözünü qış “transfer pəncərəsi”nə dikib. Ona görə ki, komandada müəyyən “təmizlik” işlərinin aparılmasını və gücləndirilməsini istəyirlər. Bəli, “Səbail” bu yöndə ilkin addımlarını atıb və Marko Nikoliç, Mirabdulla Abbasov, İnnosent Nşuti kimi oyunçularla anlaşıb. Hətta say etibarilə “dənizçilər” ən çox futbolçuyla anlaşan üç komandadan biridi. Lakin yeni simaların kollektivə nə dərəcədə faydalı olacağı sual altındadı.

Məsələn, ötən mövsüm 1-ci liqada çıxış edən, hazırda hansısa çempionatda təmsil olunmayan “İrəvan”dan ayrılan Mirabdulla 2024-cü ilin yanvarından bəri klubsuz idi. Qazaxıstan premyer-liqasından, dəqiq desək, “Turan”dan gələn Nikoliç sabiq komandasının aparıcı oyunçusu olub. 2023/24 mövsümündə 26 oyunda forma geyən mərkəz müdafiəçisinin hesabında nə qol, nə də məhsuldar olub. Ümumiyyətlə, “Turan” həmin 26 matçın 5-də qələbə qazana bilib. Yəni futbolçunun hansısa səviyyəli kollektivdən gəldiyini desək, yanılarıq. Bəs Nşuti kimdi?

Maraqlıdı ki, klubun mətbuat xidməti bu transferi elan edərkən futbolçunun klub karyerası haqda hansısa məlumat yaymayıb və Ruanda millisinin heyətində çıxdığı 10 matçda 2 qol vurmasını qabardıb. Qeyd edək ki, futbolçu ötən mövsümü “Knoxville”də (ABŞ) keçirib. Adı çəkilən komandanın aşağı liqada çıxış etməsi ayrı dərd, futbolçunun bu kollektivin aparıcı oyunçusu olmaması ayrı qəm. Nşuti 1-ci liqada mümkün 28 matçın 14-də şans qazanıb. Yəqin ki, onun həmin oyunlarda hansısa uğurla yadda qalmadığını təxmin etmək oxucularımız üçün çətin olmaz.

Təbii ki, “dənizçilər”in daha bir neçə futbolçuyla güclənmək ehtimalı böyükdü. Amma hansısa ayrılıqların yaşanması da mümkündü. Qısası, belə çətin dönəmdə atılan addımlar heç də parlaq gələcək vəd etmir. O başqa məsələ ki, ən ciddi səhvə klub rəhbərliyi tərəfindən yol verilib – premyer-liqada qalmaq kimi ciddi və ümdə amal bu səviyyədə təcrübəyə malik olmayan Cavid Hüseynova tapşırılıb. Etiraf edək ki, Şahin Diniyevin vaxtında komanda daha maraqlı, istəkli və əzmkar oyunla diqqəti çəkirdi. Əlbəttə, ürəkaçan nəticə yoxdusa, belə məqamları önə çıxarmaq mənasız yanaşmadı. Sadəcə, Bayıl təmsilçisinin yeni təyinatdan sonra inkişaf etmək əvəzinə gerilədiyini sübut etmək üçün bu cümlələrdən yararlanmağa məcburuq...

Xatırladaq ki, “Səbail” bu gün yoxlama görüşündə “Araz-Naxçıvan”la qarşılaşacaq. Deyəsən, “dənizçilər” qış fasiləsi ərzində cəmi bir yoxlama oyunu keçirmək fikrindədi. Elə bunu da xoşagəlməz detal kimi vurğulaya bilərik. Bəli, vəziyyətdən yeganə çıxış yolunun yoxlama matçı keçirmək olmadığını bilirik. Əsas məsələ maliyyə ilə bağlıdı. Xatırlayırsızsa, ötən ilin mayında “Azərbaycan Xəzər Dəniz Gəmiçiliyi” (ASCO) QSC-də baş tutan iclasda qurumun İdarə Heyətinin və “Səbail”in Müşahidə Şurasının sədri Rauf Vəliyev büdcənin ötən mövsümlə müqayisədə azaldılmasıyla bağlı qərar verdi. Mövcud maliyyə dayaqlarının yetərli olmadığı Cavid Hüseynovun bəzi açıqlamalarında da hiss olunur. Nümunə üçün baş məşqçinin “Report”a söylədiklərini dinləyin:




Görünür, “Səbail”in maddi çətinliklər üzündən “transfer pəncərəsi”ndən arzuolunan səviyyədə yararlana bilmədiyi haqda yayılan xəbərlər həqiqətəuyğundu.

Düzdü, “Futbol+” qeyd olunanlar ətrafında Cavid bəylə söhbətləşmək istədi. Lakin mütəxəssis nədənsə bir qədər gözləməyi lazım bildi. Hər halda, klubun icraçı direktoru Firuz Abdulla ümumi vəziyyəti bizdən gizlətmədi:




Xatırladaq ki, “Səbail” ilk 18 turda cəmi 9 xal toplayıb.

KƏNAN BAHADIR