2024/25 mövsümü yarılandı. Bazar günü keçirilən “Qarabağ” – “Araz-Naxçıvan” oyunundan sonra komandalar qış fasiləsinə yollandı.

“Qarabağ”ın monteneqrolu oyunçusu Marko Veşoviçlə söhbətləşdik.

- İli qələbə ilə başa vurduz. “Araz-Naxçıvan” üzərində qazanılan 2:0 hesablı qələbəni necə şərh edərdin?
- Çox maraqlı, gərgin oyun idi. Qalib gəlmək istəyirdik. “Araz-Naxçıvan” da çox yaxşı oynadı. Buna baxmayaraq, istəyimizə çatdıq, meydanı 3 xalla tərk etdik. İli qələbə ilə başa vurduğumuza görə çox şadıq. “Araz-Naxçıvan”la arada 8 xal fərqimiz var. İndi yaxşıca dincəlmək olar.

- Birinci hissədə rəqib futbolçu Urfan Abbasovla uzun müddət mübahisə etdin. Nə baş vermişdi, nəyi bölüşə bilmirdiz?
- Matçın gedişində belə gərgin anlar olur. Amma nə baş veribsə, meydanda qaldı. Oyundan sonra hər şeyi unutduq.

- Lakin duran topu arxadan Urfana vurmağın narazılıqla qarşılandı...
- Həmin epizodda top dayanmışdı, mən də Juninyoya ötürmə vermək istəyirdim. Təsadüfən belə alındı. O da elə bildi ki, mən qəsdən ona zərbə endirdim. Lakin mən topa oynamaq istəyirdim.

- Artıq mövsümün ilk yarısı başa çatdı. Ötən illə cari mövsümün ilk iki dövrəsini müqayisə etsək, çempionatın səviyyəsində fərq görürsən?
- Birmənalı şəkildə çempionatın səviyyəsində fərq hiss edirik. Səviyyə fərq artır. Çox səviyyəli futbolçular gəlib. İldən-ilə inkişaf gedir. Azərbaycan çempionatının səviyyənin qalxması üçün keyfiyyətli legionerlərin gəlməsi vacibdi. Bu halda rəqabət, maraqlı oyunların sayı artar. Belədə stadiona daha çox azarkeş toplaşar.

- Uzunmüddətli zədədən qayıtdın. Bir müddət kənarda qaldığını nəzərə alsaq, başa çatmaqda olan ili özün üçün necə dəyərləndirirsən?
- Maraqlı il keçdi. Çox oyun keçirdik. Hər futbolçunun karyerasında zədə olur. Təəssüf ki, həmişə sağlam qalmaq mümkün deyil. Biz də çox oyun keçirdik. Hazırda məndən başqa da zədəli futbolçularımız var. Ümid edirəm ki, 2025-ci il daha yaxşı olacaq. Zədəsiz bir il keçirəcəyik.

- Bəs “Qarabağ” üçün 2024-ü necə qiymətləndirirsən?
- Bu ili bir ömür xatırlayacağıq. 2024-cü ili iki hissəyə bölərdim. Birinci hissəsində biz tarixi nəticələr əldə etdik. “Braqa” və “Bayer” ilə oyunlar heç vaxt unudulmayacaq. İllər sonra da möhtəşəm nəticələrimizi yada salacağıq. Avrokuboklarla yanaşı, mövsümün sonunda həm çempion olduq, həm də ölkə kubokunu qazandıq. Təəssüf ki, yaydan sonra hər şey istədiyimiz kimi alınmadı. Çempionlar Liqasında qrup mərhələsində oynamaq istəyirdik. Lakin pley-offda uduzduq. Avroliqada isə 6 matçın 5-də məğlubiyyət acısı yaşadıq. Halbuki daha yaxşı nəticələr qazanamq mümkün idi. Təəssüf ki, nəticələr xeyrimizə olmadı.

- Avroliqada vəziyyət elədi ki, pley-off şansınız çox azdı. Bu məqam son iki oyuna köklənməyinizə mane olmayacaq?
- Xeyr, hər iki matça ciddi yanaşacağıq. Əlimizdən gələni edəcəyik. Lakin indiki məqamda hər şey bizdən asılı deyil. Digər komandaların da necə oynayacağından çox şey asılıdı. Bununla belə, əminliklə deyirəm: biz bütün gücümüzü meydanda qoyacağıq ki, son iki oyunda qələbə qazanaq. Sona qədər mübarizə aparacağıq.

- İlin sonunda müxtəlif sorğular keçirilir. “Futbol+”in ənənəvi sorğusunda Azərbaycanda yerli futbolçulardan kimi ilin ən yaxşısı adına layiq görürsən?
- Bir qədər düşünməliyəm...

- Deyəsən, qəliz sual oldu... “Qarabağ”dakı komanda yoldaşlarından da seçə bilərsən.
- Onda əminliklə Toral Bayramov deyirəm. Gəncdi, bu il çox vacib qollar vurub. Birmənalı şəkildə deyirəm ki, onun gözəl gələcəyi var.

RÖYANƏ OĞUZ