''Roma'' Paulo Dibalanı ''Qalatasaray''a buraxmaq istəməsə də, şayiələrə inansaq, qış transfer dönəmində komanda ən azı 5 futbolçu ilə vidalaşacaq.

''Tuttosport''un yaydığı xəbərə görə söhbət Brayan Kristante, Eldor Şomurodov, Lorentso Pelleqrini, Mario Ermoso və Zeki Çelikdən gedir. Rəhbərliyin fikrincə, bu futbolçular ümidləri doğrultmur. Ermosoya ''Fənərbaxça'', klubun kapitanlarından biri olan təcrübəli Pelleqriniyə ''Qalatasaray'' maraq göstərir. Türkiyə yığmasının üzvü olan Zeki Çelikin isə vətəninə qayıtmaq ehtimalı çoxdu. Ona ən ciddi maraq göstərən klub ''Qalatasaray''dı. Daha öncə ''Lill''də çıxış edən Zeki Çelik 2022-dən ''Roma''nın şərəfini qoruyur.

Bu mövsüm iştirak etdiyi 22 rəsmi oyunda onun aktivində 1 məhsuldar ötürmə var. Qeyd edək ki, cəmi 17 tur arxada qalsa da, ''Roma''nı bu mövsüm artıq 3 məşqçi çalışdırıb. Komanda mövsümə Daniele De Rossinin başçılığı altında başlamış, daha sonra onu İvan Yuriç əvəzləmişdi. Amma xorvatiyalı məşqçi də ümidləri doğrultmayınca baş məşqçi postuna təcrübəli Klaudio Ranyeri gətirilmişdi. Komanda hazırda 17 oyuna topladığı 19 xalla 10-cu pillədədi.

ƏLİ