Misli premyer-liqasında hər turun müəyyən özəllikləri olur.

Məsələn, bu dəfə “Araz-Naxçıvan” tarixi ilk yaşadı, Qurban Qurbanovla Vasili Berezutskinin ilk dueli gerçəkləşdi, Samir Abasov Sumqayıt səfərindən boynubükük döndü. Bir sözlə, axtaran Azərbaycan çempionatında da çoxlu cazibədar məqam tapa bilər!

Tur “Səbail” – “Araz-Naxçıvan” oyunu ilə start götürdü. Meydan sahibləri 1 xal da qazana bilmədi. Baxmayaraq ki, onlar oyunboyu can qoydular, daim qol axtarışında oldular. Amma “dənizçilər”in heyətində nə Felipe Santos var, nə də Ramon Maçado! Odu ki, “qırmızı-ağlar”ın növbəti qələbəsinə təəccüblənməyə dəyməz. Həm də tarixi qələbəsinə!

Axı premyer-liqada 4-cü mövsümünü keçirən Naxçıvan təmsilçisi tarixdə ilk dəfə ölkə çempionatında turu 1-ci pillədə başa vurub. “Araz-Naxçıvan” buna qədər heç vaxt turu 1-ci yerdə bitirməmişdi. Elmar Baxşıyev avrokuboklara vəsiqə uğrunda mübarizədəki əsas rəqiblərinin müxtəlif səbəblərdən başının qarışmasından ustalıqla yararlanır, xal ehtiyatını artırır. Cavid Hüseynov isə “heyət kasaddı” deyib durur, qış fasiləsini gözləyir.

Turun mərkəzi görüşündə qalib müəyyənləşmədi. 90 dəqiqə ərzində meydanda əsl mübarizə getdi. Xüsusən də 2-ci hissə futbol həvəskarlarının zövqünü oxşadı. Ümumilikdə oyunu iki hissəyə bölə bilərik. Birinci hissədə söz sahibi “Sabah” idisə, ikincidə “Qarabağ” dominantlığı ələ almağı bacardı. Bu heç-heçə “köhlən atlar”a baha başa gəldi. Düzdü, ağdamlılar hələ də itirilməyən xallara görə liderdi. Ancaq belə liderlik başqadı, real liderlik başqa! Hər halda, Qurban Qurbanov oyunsonrası mətbuat konfransında heç-heçənin ədalətli nəticə olduğunu söyləməyi lazım bildi və doğrunu dedi.

“Kəpəz” – “Zirə” oyunu meydan sahiblərinin darmadağını ilə bitdi. Gəncə klubu qış fasiləsində ciddi şəkildə güclənməsə, elitadan gedəcəkdi. Bu həqiqət artıq hər kəsə gün kimi aydındı. Əlbəttə, “sarı-göylər” bu gün “Səbail”dən bir addım öndə olması ilə öyünə bilər. Amma bu kövrək üstünlükdü. Elə həmin “Səbail” də qış fasiləsində güclənəcək. Hər halda, əcnəbi futbolçuların Gəncəni yox, Bakını seçməsi daha realdı.

“Sumqayıt” – “Neftçi” oyununda “gənclik şəhəri”ndə yaşayanlar qonaqların baş məşqçisi Samir Abasova sərt üzünü göstərdi. Düzdü, Samir bəy oyunsonrası mətbuat konfransında azarkeşlərin üstünə getmədi, onları kiminsə öyrətdiyini vurğulamaqla kifayətləndi. Amma Abasovun pərtliyi ortada idi. Yenə azarkeşlərin münasibətinin əvəzində qələbə qazanmaq mümkün olsaydı, dərdyarı. “Neftçi”nin futbolçuları Sumqayıtda sanki “kim çox səhv edəcək” yarışına girmişdi. Samir bəy onu düz deyir ki, bu futbolçuların əksəri ağ-qara formanı geyməyə layiq deyil. Bunu etiraf etmək nə qədər çətin olsa da!

Turun son matçında hər iki komanda baxımlı oyun nümayiş etdirirdi. Tovuzlular iki dəfə hesabda geri düşdü və hər dəfə də bərabərlik qolunu vurmaq üçün özündə güc tapdı. 4-cü uzatma dəqiqəsində qələbə topunu vuran panamalı Roderik Miller onların qəhrəmanı oldu. “Turan Tovuz” kubokda mübarizəni dayandırandan sonra premyer-liqadan daha möhkəm yapışmalıdı. “Şamaxı”dan isə danışmağa dəyməz. Ayxan Abbasovun komandası 9 turdu qələbəyə həsrətdi.

Misli premyer-liqası 
2-ci dövrə, 16-cı tur 
7 dekabr
Səbail - Araz-Naxçıvan 0:2 
Sabah - Qarabağ 1:1
8 dekabr 
Kəpəz - Zirə 0:4
Sumqayıt - Neftçi 2:0
9 dekabr
Turan Tovuz - Şamaxı 3:2

Bombardirlər: Felipe Santos (Araz-Naxçıvan) – 8, Coy-Lens Mikels (Sabah), Davit Volkov (Zirə), Leandro Andrade (Qarabağ) – 7.

ƏSƏD SEYİDOV