Qrupun son oyunlarında gözlənilməz hadisə baş vermədi. Hər iki matç məhsuldar heç-heçə ilə nəticələndiyindən komandaların sonuncu tura başladığı mövqeləri dəyişmədi.

Şimali İrlandiya yığmasının liderliyini qoruması üçün Lüksemburqda uduzmaması kifayət idi. Maykl O’Neyllin komandası ilk dəqiqələrdən hücuma atılmaqla sensasiyaya imkan vermək niyyətindən çox uzaq olduğunu göstərdi. 19-cu dəqiqədə Prays Şi Çarlzın ötürməsi ilə hesabı açdı. Fasilədən az sonra Prays Bredliyə ikinci qolu vurması üçün ötürmə verdi. Amma meydan sahibləri erkən təslim olmadılar. Onların rəqibin bir qədər arxayınlaşmasından istifadə etdiklərini də bildirək. Koraç ilə Rodrigeşin 3 dəqiqə ərzində vurduğu qollar hesabın bərabərləşməsini təmin etdi. Elçin Məsiyev final fiti ilə 2:2 hesabını qeydə aldı. Bu nəticə Şimali İrlandiya yığmasının qrup lideri kimi B liqasına yüksəldiyini rəsmiləşdirdi. Qrupun sonuncu olan Lüksemburq isə C liqasındakı yerini qorumaq üçün D liqasında yarışan komandalardan biri ilə pley-off oyunları keçirəcək.

Qrupun Sofiyada keçirilən digər oyunu hər iki komanda üçün əhəmiyyət daşıyırdı. Bolqarıstan yığması Belarusu evdə məğlub etməklə qrupu lider kimi, ən pis halda isə 2-ci yerdə başa vurmağa çalışacaqdı. Postsovet məkanından olan komanda isə qələbə sayəsində 2-ci pilləyə yüksələcəkdi. Xatrıladaq ki, bu komandalar arasında sentyabrın 5-də UEFA-nın məlum qadağası səbəbindən neytral meydanda - Macarıstanın Zalaeqerseq şəhərində keçirilən matçda hesab açılmamışdı. Amma “Vasil Levski” stadionunda baş tutan oyunun əvvəli bolqarların fəallığı sayəsində maraqlı keçdi. Panayotov 12-ci dəqiqədə hesabı açdı. İlk hissə ev sahiblərinin aşkar üstünlüyü ilə yadda qalsa da, Lapouxov bir daha topu tordan çıxarmalı olmadı. Onun oyundaşları fasiləyə qədər Mitovun qoruduğu qapıya yalnız bir dəqiq zərbə endirə bildilər ki, bolqar qapıçı qola imkan vermədi. Lakin ikinci hissədə Karlos Alosun əvəzləmələri komandasının cavab qolunu vurmasına şərait yaratdı: Kovalyov özü kimi meydana fasilədən sonra çıxan Yablonskinin ötürməsini qola çevirdi. Beləliklə, postsovet məkanının təmsilçisi C liqasında qaldı, Bolqarıstan isə B liqasına yüksəlmək üçün pley-off oyunları keçirəcək.

C liqası, 3-cü qrup
Lüksemburq - Şimali İrlandiya 2:2 (0:1)
Lüksemburq: Pereyra Kardoso (Şon, 74), Yans, Pinto (Olesen, 56), Bohnert (Kurki, 74), Karlson (M.Martins, 81), Koraç, K.Martins, Barreyro (Mahmutoviç, 56), Moreyra, J.Rodrigeş, Sinani.
Şimali İrlandiya: P.Çarlz, Ballard, Ham, Bredli, Spenser, Makkonvil, Makkann (Sevill, 76), Qalbrayt (Smit, 89), Prays (Devenni, 90+2), Ş.Çarlz, D.Çarlz (Rid, 76).
Qollar: Prays, 19 (0:1). Bredli, 50 (0:2). Koraç, 72 (1:2). J.Rodrigeş, 75 (2:2).
Vərəqələr: Spenser, 41. Kurki, 80. Ham, 80 - sarı.
Hakim: Elçin Məsiyev (Azərbaycan).
18 noyabr. Lüksemburq. 6870 tamaşaçı.

Bolqarıstan - Belarus 1:1 (1:0)
Bolqarıstan: Mitov, A.Petkov, S.Petrov, Popov, Nürnberger, Krayev, Milanov (Rusev, 75), Panayotov (Antov, 90+4), Kirilov (Krastev, 76), M.Petkov (Atanasov, 88), Kolev (Ahmedov, 76).
Belarus: Lapouxov, Karpoviç, Martınoviç, Politeviç, Polyakov (Zabelin, 59), Prişepa (Kovalyov, 46), Ebonq, Boçerov (Yablonski, 59), Qromıko (Antilevski, 59), Lisakoviç, Şikavka (Savitski, 73).
Qollar: Panayotov, 12 (1:0). Kovalyov, 70 (1:1).
Vərəqələr: Prişepa, 10. Nürnberger, 31. Ebonq, 53. Karpoviç, 62. Yablonski, 64. Politeviç, 85 - sarı.
Hakim: Allard Lindhaut (Niderland).
18 noyabr. Sofiya. 2200 tamaşaçı.

1. Şimali İrlandiya 6 3 2 1 11-3 11
2. Bolqarıstan 6 2 3 1 3-6 9
3. Belarus 6 1 4 1 3-4 7
4. Lüksemburq 6 0 3 3 3-7 3