B liqasının 1-ci qrupunda sonuncu tur ərəfəsində heç bir suala cavab tapılmamışdı.

AÇ-2024-ün 4 iştirakçısı arasında intriqa ən yüksək həddə idi: 3 komanda A liqasına yüksələ, 3 komanda isə birbaşa C liqasına düşə bilərdi. Hər halda, Çexiya rəqibləri ilə müqayisədə daha əlverişli vəziyyətdə idi.

Ötən ay liderliyi ələ alan Çexiya yığması Gürcüstanla A liqasına birbaşa vəsiqə uğrunda həlledici oyunu öz meydanında keçirəcəkdi. Yeri gəlmişkən, qafqazlılar sentyabrın 7-də Tiflisdə slavyanları 4:1 hesabıyla darmadağın etmişdilər. Amma Villi Sanyolun komandası bu dəfə məğlubiyyətlə barışmalı oldu. Matça çox fəal başlayan çexlər artıq 24-cü dəqiqədə Şults və Qlojekin zərbələri ilə iki topluq üstünlük qazandı. Qonaqların ilk hisədə hücumda zəif göründüklərini iddia etmək doğru olmaz. Belə ki, Loçoşvili ilk qoldan sonra əla şansı dəyərləndirə bilmədi, Kvaratsxeliya isə fasilə ərəfəsində dirəyi nişan aldı. Amma çexlər ilk hissəni qalib kimi başa vurmağa layiq idilər.

Fasilədən sonra meydandakı mübarizə bərabərləşdi və 60-cı dəqiqədə Mikautadze Kakabadzenin ötürməsi ilə fərqi azaltdı. Bundan sonra oyunun tempini azaldan Çexiya yığması topun böyük ölçüdə meydanın mərkəzində hərəkət etməsinə nail oldu. Lakin son dəqiqələrdə ev sahiblərinin bəxti gətirdi. Zivzivadze yaxaladığı şansların heç birindən yararlana bilmədi. Kovarj hər iki epizodda komandasını xilas etdi və Çexiya Gürcüstanı A liqasına buraxmadı. Qafqazlılar bu liqaya vəsiqə uğrunda ikinci şansını da itirdilər.

Çünki qrupun digər oyununda Ukrayna səfərdə Albaniyaya qalib gələrək 2-ci yeri tutdu. Tiranadakı matçın ilk 10 dəqiqəsində iki qol vuran Sergey Rebrovun komandası fasiləyə qədər rəqibinə bir real şans da vermədi. Balkanlılar yalnız ikinci hissədə oyunda dönüş yaratmağa az-çox nail oldular. Ancaq Bayraminin penaltidən vurduğu qol Silvinyonun komandasını məğlubiyyətdən xilas etmədi. Sonuncu pillədən 2-ci yerə yüksələn Ukrayna A liqasına pley-off yolu ilə vəsiqə qazanmağa, Gürcüstan B liqasındakı yerini məhz bu yolla qorumağa çalışacaq, Albaniya isə növbəti mövsümə C liqasında başlayacaq.

B liqası, 1-ci qrup
Çexiya – Gürcüstan 2:1 (2:0)
Çexiya: Kovarj, Tsoufal, Qoleş, Yemelka, Borjil, Çernı (Provod, 57), Çerv, Kral, Şults (Kuxta, 88), Kliment (Xitil, 57), Qlojek (Linqr, 73).
Gürcüstan: Mamardaşvili, Kakabadze (Lobjanidze, 79), Kaşiya, Qvelesiani (Davitaşvili, 36), Dvali, Loçoşvili, Kiteişvili (Mekvabişvili, 60), Koçoraşvili, Çakvetadze (Zivzivadze, 61), Kvaratsxeliya, Mikautadze (Qoçoleişvili, 70).
Qollar: Şults, 3 (1:0). Qlojek, 24 (2:0). Mikautadze, 60 (2:1).
Vərəqələr: Dvali, 23. Mikautadze, 35. Qoleş, 67. Kral, 75. Kvaratsxeliya, 90+4. Xitil, 90+4. Tsoufal, 90+4. Kuxta, 90+5. Kaşiya, 90+5 - sarı.
Hakim: Anastasios Papapetru (Yunanıstan).
19 noyabr. Olomouts. 12221 tamaşaçı.

Albaniya - Ukrayna 1:2 (0:2)
Albaniya: Strakoşa, Ayeti, Balliu, İsmayli, Mitay, Laçi (Seferi, 90), Ramadani (Tutsi, 76), Muçi (Hoxa, 51), Asllani, Asani (Bayrami, 46), Daku (Uzuni, 46).
Ukrayna: Trubin, Zinçenko (Şaparenko, 69), Matviyenko, Mikolenko, Konoplya (Zuç, 76), Zabarnı, Qutsulyak (Nazarenko, 85), Kalyujnı, Mudrik (Talovyerov, 85), Sudakov, Yaremçuk (Dovbik, 76).
Qollar: Zinçenko, 5 (0:1). Yaremçuk, 10 (0:2). Bayrami, 75-p. (1:2).
Vərəqələr: Bayrami, 68. Mitay, 79. Dovbik, 79. Tutsi, 80 - sarı.
Hakim: Joao Pineyro (Portuqaliya).
19 noyabr. Tirana. 20547 tamaşaçı.

1. Çexiya 6 3 2 1 9-8 11
2. Ukrayna 6 2 2 2 8-8 8
3. Gürcüstan 6 2 1 3 7-6 7
4. Albaniya 6 2 1 3 4-6 7