"Belə oyunla heç nəyə nail ola bilmərik" - Vitali Borisov
Dünən keçirilən Bosniya və Hersoqovina - Azərbaycan oyunundan sonra millimizin baş məşqçisi Vitali Borisovun azfutzal.az-a açıqlama verib.
"Football-plus.az" xəbər verir ki, mütəxəssis komandasının 0:7 hesablı məğlubiyyətini belə şərh edib:
“Çox pis oynadıq. Birinci hissədə müqavimət göstərdik, mümkün qədər mübarizə apardıq. Təəssüf ki, fasiləyə 2 saniyə qalmış qol buraxdıq. Halbuki bizim də epizodumuz oldu. İkinci hissədə isə ardıcıl qollar buraxdıqdan sonra uşaqlar ruhdan düşdü. Bu görüşün ən yaxşısı qapıçımız Emin Kürdov oldu. Ona “çox sağ ol” düşür. Əlindən gələ qədər köməklik etdi”.
Borisov qeyd edib ki, milli komandamız belə oyunla nəyəsə nail ola bilməz:
“İşimiz çoxdu. Belə oyunla heç nəyə nail ola bilmərik. Düzdü, milli çempionat yeni başlayıb, amma əsas çatışmazlıq beynəlxalq oyun təcrübəsinin azlığıdı. Bu baxımdan “Araz-Naxçıvan”ın üzvləri və milliyə bir müddətdi dəvət olunan futzalçılar nisbətən seçilirlər. Oyunu təhlil edəcəyik. Sabah daha yaxşı oynamalıyıq. Rəqibimiz atletik cəhətdən seçilir. Topla da yaxşı oynayırlar”.
Digər xəbərlər
