“Səbail” Misli premyer-liqasının 10-cu turunda “Neftçi”yə uduzdu.

“Football-plus.az” xəbər verir ki, oyunsonrası mətbuat konfransında “Səbail”in baş məşqçisi Şahin Diniyev jurnalistlərin suallarını cavablayıb:

- Samir Abasovu və “Neftçi”ni qələbə münasibəti ilə təbrik edirəm. Oyun sistemində böyük problemlərimiz var idi. Kiçik komandayıq. 3 nəfərin olmaması, dördüncünün isə zədəli çıxması özünü göstərdi. "Şamaxı" ilə matçda oturuşmuş heyətimiz var idi. Bu gün istədiyimiz oyunu göstərə bilmədik. Sanki futbolçular "Neftçi"nin adından qorxdular. İrəli baxmalıyıq. Tam rəqibin üstünlüyü ilə keçən oyun oldu. Qarşıda daha vacib oyunlarımız var. Demişdim ki, "Neftçi" bu heyətlə düşdüyü vəziyyətdən çıxacaq. Gərək biz də taleyimizlə barışaq. "Sumqayıt" və "Kəpəz"lə matçlar bizim üçün çox vacibdi. Gələn oyunda cəzalı futbolçularımız qayıdacaq.Yaxşı oyun göstərib qalib gəlməyə çalışacağıq.

- Dediz ki, kiçik komandayıq. Bunu hansı mənada nəzərdə tutursuz?
- Hakimin, büdcənin üstünə atmaq asandı. Əlində heyət varsa, oynamalısan. 19-20 yaşlı futbolçulara şans verdik. Birdən-birə 4 oyunçu olmayanda komanda öz gücünü göstərə bilmir. Kiçik komanda sözünü bu mənada dedim. Rotasiya üçün ehtiyat oyunçular skamyamız o qədər də zəngin deyil. Bu gün istədiyimiz oyunun heç 30-40 faizini oynaya bilmədik. Bəlkə də 4 futbolçunun olmaması buna təsir etdi.

- İlqar Qurbanov bildirib ki, Fernando Santuşa qədər baş məşqçilər milli komandaya sifarişlə futbolçular çağırıblar. Millinin keçmiş baş məşqçisi kimi siz bu haqda nə deyə bilərsiz?
- Qurban Qurbanovun yaxşı sözü var, qeyri-ciddi fikrə münasibət bildirmək ciddi adamların işi deyil. O haqda çox danışa bilərəm. İlqarın milliyə gəlməsindən tutmuş bura qədər... İnsan həmişə danışığına fikir verməlidi. Nəyisə müdafiə edirsənsə, ağıllı etməlisən. Savadsız müdafiə qurmaq yaraşmır.

- Samir Abasova yenə məğlub olduz. Düşünmürsüz ki, “Neftçi” rəhbərliyi bu statistikanı nəzərə alıb, komanda qələbə qazansın deyə Samir bəyi təyin etdi?
- Biz meydançaya çıxanda tabloya baxmırıq. Tabloda “Neftçi” - “Səbail” yazılmışdı, Şahin - Samir yox.

- "Səbail" bu gün istəksiz görünürdü. Sanki Samir Abasovun debüt oyununda ona jest edirdiz...
- Samir Abasov Qusardan bir kisə fındıq, bir kisə şabalıd gətirmişdi. Amma sualınızın ciddi cavabı odu ki, bu gün futbolda simpatiya mümkün olmayan bir şeydi. Bu gün kim kimə jest etməlidi? 15 xal qabaqda deyilik. 45+2-ci dəqiqədə qol buraxmasaydıq, ikinci hissə tam fərqli olacaqdı. Komanda bu gün uğur qazanmağı çox istəyirdi. Əfsuslar olsun ki, "Neftçi" bütün komponentlərdə bizi qabaqladı. Uduzmağı da etiraf etmək lazımdı.

ƏSƏD SEYİDOV