"Şamaxı" Misli premyer-liqasının 10-cu turunda evdə "Araz-Naxçıvan"a uduzdu - 0:1.

"Football-plus.az" xəbər verir ki, "şirlər"in baş məşqçisi Ayxan Abbasov oyunsonrası mətbuat konfransında jurnalistlərin suallarını cavabladı.

- Çətin oyun olacağını bilirdik. Ciddi itkilərimiz var idi. Buna baxmayaraq, yaxşı mübarizə apardıq. Bəzi futbolçuların yükü çox oldu. Belə matçlarda qol imkanlarının sayı az olur. Təəssüf ki, yaratdığımız şanslardan istifadə edə bilmədik. "Araz-Naxçıvan" çempionatın yaxşı çıxış edən komandalarından biridi. Yolumuza davam etməliyik. Çox şeylərlə mübarizə aparırıq. Son oyunlarda bizə qarşı hakim səhvlərinə görə çətinlik çəkirik. Çox istəyərdim ki, Hakimlər Komitəsinin sədri mübahisələrə səbəb olan açıq əl epizoduyla bağlı fikirlərini açıqlasın. Çünki başqa komandalarda eyni hal yaşananda penalti təyin edildiyinin şahidi olmuşam. Bəlkə biz qaydaları bilmirik?

- Hakimlərdən şikayət etdiz. Səviyyələri budu, yoxsa qərəz var? Onsuz da "Şamaxı"nın büdcəsi çox deyil. Niyə məhz bu komandaya qarşı belə davranılır?
- Kimisə ittiham etmək istəmirəm. "Səbail"lə matçda bizə lazımsız sarı vərəqələr verildi. Mərt Çəlikin Belajdi Pusiyə etdiyi hörmətsizliklə bağlı videonu da izləmişəm. Futbolçumuzu dörd dəfə vurdu, amma hansısa tədbir görülmədi. "Turan Tovuz"la oyunda 4 dəqiqə əlavə olunmuşdu. 90+7-ci dəqiqədə top Rüfətin əlinə dəydiyinə görə penalti təyin edilmişdi. Futbolçularımın haqqına girirlər.

- Heyətinizin yetərli olmadığını düşünürsüzmü?
- İddiamız premyer-liqada qalmaqdı. Ardıcıl qələbələr qazananda hədəfimizin dəyişmədiyini demişdik. Bilirdik ki, bizi qarşıda problemlər gözləyir. Əlbəttə, heyətimiz yetərli deyil. Belə hallar nəticəyə təsir edir. "Şamaxı" daha möhkəm olmalıdı.

KƏNAN BAHADIR