Savanna olmasaydı, Lebron da olmazdı!
“Leykers”in forvardı Lebron Ceyms xanımı Savannanın karyerasındakı rolundan danışıb, onun dəstəyinin həm parket üzərindəki, həm də kənardakı uğurlarında böyük rol oynadığını deyib.
Ulduz basketbolçu bununla bağlı “Starting 5” sənədli serialında danışıb:
“Savanna mənə karyeram boyunca istədiyimi əldə etməkdə yardımçı oldu. Axı o, dahilərin dahisi olmaq istəyimdən xəbərdar idi. Və Savanna mənə bu imkanı yaratdı. Mənə narahat olmamağı tapşırdı, evdə qayda-qanun yaratmağı öz boynuna götürdü. Onsuz mən bugünkü Lebron olmazdım”.
Yeri gəlmişkən, məşhur insayder Şəms Çaraniya Lebronun oğlu Bronni ilə ilk rəsmi oyununun nə vaxt baş tutacağı ilə bağlı xəbər yayıb. Onun dediyinə görə, bu hadisə “gölməçəsevərlər”in müntəzəm çempionatdakı elə ilk oyununda gerçəkləşəcək. Xatırladaq ki, Lebronla Bronni artıq mövsümöncəsi oyunlarda birgə meydana çıxıb. Çaraniyanın “Get Up” efirində söylədikləri:
“Çox və çox tez tarixi hadisənin şahidi olacağıq. Mənə məlum olan xəbər budu ki, “Leykers”də ata ilə oğulun ilk birgə oyununun elə açılış günündə baş tutacağını gözləyirlər. “Leykers” oktyabrın 22-də “Minnesota” ilə qarşılaşacaq. Plan və ümidlər bu yöndədi”.
Digər xəbərlər
