Deyəsən ''Bursaspor'' camiəsi nəhayət, ölü nöqtədən tərpənərək yenidən qarşısına yuxarı liqalara dönmək hədəfi qoyub.

2010-cu ildə Türkiyə çempionu olmaqla tarix yazan ''timsahlar'' hazırda 3-cü liqada, yəni 4-cü divizionda çıxış edirlər.

Komandanın bu mövsüm az qala hər ev oyununda bu turnirin azarkeş rekordunun qırıldığını xəbər vermişdik. İndi də ''Bursaspor'' başqa bir göstərici ilə diqqət çəkməyə başlayıb.

Pablo Martin Batalyanın komandası bu mövsüm hələ də qol buraxmayıb. ''Ağ-yaşıllar'' 6-sı 3-cü liqa, 2-si ölkə kuboku çərçivəsində olmaqla keçirdikləri 8 oyunun hamısında qapını toxunulmaz saxlayıblar! ''Bursaspor'' bu mövsüm Türkiyənin bütün peşəkar liqalarında hələ də qol buraxmayan yeganə kollektivdi.

Son turda evdə ''Kahramanmaraşspor''u 3:0 məğlub edən Bursa təmsilçisi həm də nəhayət ki, liderliyə yüksəldi.

ƏLİ