İtaliyalı hakim ÇL-dən və A seriyasından kənarda qalıb - Mareska futbolçunu ölümlə hədələyib
İtaliyalı hakim Fabio Mareska Çempionlar Liqasında PSV ilə "Sportinq" arasında keçirilən oyunun, həmçinin A seriyasının idarəçiliyindən müvəqqəti uzaqlaşdırılıb. Belə sərt cəzaya onun futbolçulardan birini ölümlə hədələməsi səbəb olub. Söhbət Küveyt premyer-liqasının klubu "Əl-Ərəbi”nin formasını geyən Haled Əl-Marşeddən gedir.
"Corriera della Sera" xəbər verir ki, mübahisəli insident sentyabrın 27-də Küveyt premyer-liqası çərçivəsində "Əl-Küveyt" ilə "Əl-Ərəbi" arasında keçirilən oyunda baş verib. Həmin oyunu Mareska idarə edib. Əl-Marşedin dediyinə görə, italiyalı hakim oyunun sonunda ona belə deyib:
"Növbəti dəfə görüşsək, səni öldürəcəm".
Ancaq fərqli informasiya da var. Elə həmin nəşrin yazdığına görə, bir başqa oyunçu ifadənin yalnız birinci hissəsini eşidib. Yeri gəlmişkən, Mareska özü sözlərini zarafat kimi qələmə verməklə dolayısıyla ittihamı təsdiqləyib.
Klub bu olaya sərt şəkildə reaksiya verib. "Əl-Ərəbi”nin Direktorlar Şurasının üzvü Adnan Mahmud Abel sosial şəbəkə hesabında belə yazıb:
"Haled Əl-Marşedi ölümlə hədələyən italiyalı hakimdən şikayət etmək üçün polis bölməsinə yollanırıq".
Abel onu da əlavə edib ki, yaşananlarla bağlı sübutu var. Ancaq belə görünür ki, polisə şikayət ərizəsi daxil olmayıb. Olayın ardından heç bir diplomatik qalmaqal baş vermədi. Üstəlik İtaliya Futbol Federasiyasına olayı təsdiqləyən hansısa sübut, heç adi oyun protokolu da təqdim olunmayıb. Bununla belə, federasiya Mareskaya münasibətdə tədbir görüb.
Çox güman, Küveytdə də bu işin arxasınca düşməyiblər. Axı hakimə münasibətdə hansısa sanksiya və ya onun premyer-liqa oyunlarının idarəçiliyindən uzaqlaşdırılmasıyla bağlı qərar yoxdu. Avropada isə bu məsələyə fərqli münasibət göstəriblər — Mareska dərhal idarə edə biləcəyi oyunlardan kənarlaşdırılıb.
Məsələn, Fabionun adı dərhal PSV — "Sportinq" oyununun idarəçiliyinə cəlb olunan hakimlərin siyahısından çıxarılıb. O, Eyndhovenə 4-cü hakim kimi yollanacaqdı. Mareskanın əvəzinə briqadaya digər italiyalı hakim — Daniele Doveri əlavə olunub. Vətənində isə Fabionu biraylığa idarəçilikdən uzaqlaşdırıblar.
Xatırladaq ki, Mareska 2011-ci ildən A seriyasının, 2018-ci ildən isə avrokubok oyunlarında iş başında olur. O, ötən yaz da qalmaqalın mərkəzinə düşmüşdü, ancaq qurban kimi. Massimilano Alleqri "Yuventus”nu "sükanı arxasında" keçirdiyi son oyunda məhz Mareskanın üstünə qışqırmışdı. Referi həmin vaxt mütəxəssisə qırmızı vərəqə göstərmişdi, sonra isə Allerqi işdən qovuldu. Onda turinlilər olayı belə izah etmişdi:
"Qovulmaya İtaliya kubokunun finalının gedişində və ondan sonra müəyyən davranış səbəb oldu. Klub hesab edir ki, belə davranış "Yuventus”un dəyərləri ilə bir araya sığmır".
Digər xəbərlər
