Futbol üzrə ölkə çempionatında birinci dövrə arxada qaldı.

Mövsümün kəşflərindən biri də “Şamaxı”dı. Ayxan Abbasov özünəməxsus komanda yarada bilib. Düzdü, “şirlər” son turda “Səbail”ə uduzmaqla azarkeşlərini məyus etdi. Onların albaniyalı hücümçusu Belajdi Pusi oyundan sonra “Futbol+”in suallarını cavabladı.

- 9-cu turda autsayderlərdən “Səbai”ə uduzduz. Birinci dövrəni necə dəyərləndirərdin?
- Hamımız buna görə üzgünük. Bundan da çətin matçlar keçirmişik. Rəqiblərimizin gücünə bələd olduq. Hələ ki mövsümün əvvəlidi. İkinci dövrədə hər şey başqa formada cərəyan edə bilər. Deyə bilmərəm ki, pis nəticələr göstərdik, amma tam yaxşı da demək olmaz. Uda biləcəyimiz oyunlarda 3 xal itirdik. Amma məğlubiyyətimiz az oldu. Zəif cəhətlərimizi bildik. Bundan sonra onların üzərində işləyəcəyik. Baş məşqçimiz də hər şeyi təhlil edir, bizə tapşırıqlar verir. Zamanımız var. Bir neçə gün dincəlib növbəti oyuna hazırlaşacağıq. Gələcək turlarda daha yaxşı oyun nümayiş etdirəcəyimizə inanıram.

- 8-ci turda çempionatın sürpriz komandalarından sayılan "Turan Tovuz"la heç-heçə etmişdiz. Bəs “Səbail”ə niyə qol vura bilmədiz?
- Futbol belədi. Bəzən güclü komandaları udarsan, bəzən də zəiflərə uduzursan. Amma "Səbail" də zəif rəqib deyil. Çox qol vura bilən komandalardan biridi. Ona görə bəzən belə hallar baş verə bilər. Həm də qırmızı vərəqə işimizi bir qədər çətinləçdirdi. İndi nəyəsə heyifsilənmək mənasızdı. Önümüzə baxmalıyıq.  

- "Turan Tovuz"un qapısına qol da vurmuşdun. Sabiq komandanla oyunda motivasiya önəmli rol oynadı?
 - Xüsusi bir motivasiyam yox idi. Tovuzda iki gözəl il keçirmişəm. Bu da mənim üçün sıradan bir oyun idi. Yaxşı hazırlaşdıq, qol vurdum. Bu dəfə də xal almaq istəyirdik. Qismət belə alındı. Bu, hələ heç nəyi həll etmir. Biz öz gücümüzə inanırıq.

- "Şamaxı" hansı hədəf uğrunda mübarizə aparır?
- Məqsədimiz hər oyun yaxşı oynamaq və hər turda xal almaqdı. Əsas hədəf premyer-liqada qalmaq olacaq. Amma bacardığımız qədər daha yuxarı pillələrə qalxmaq istəyirik.

- Bəs hansı komanda ilə oyun daha çətin və maraqlı keçib?
- Hər oyunda çətinlik var. Rəqiblərimiz zəif deyil. Biz premyer-liqaya yeni qayıtmışıq. Bunu nəzərə almalıyıq. Hər oyun fərqli çətinliklərlə qarşılaşırıq. Deyə bilmərəm ki, hansısa matç digərindən zəif keçib. Bəzən belə olur ki, məğlub olursan, amma bu, zəif olduğuna görə deyil. Sadəcə, nəsə alınmaya bilər. İrəli baxmaq lazımdı.

- Şamaxıda həyatın necə keçir, ora tam uyğunlaşmısanmı?
- Artıq iki ildi Azərbaycanda yaşayıram. Bura mənə doğmadı. Daha öncə də Ayxan müəllimlə birgə işləmişəm. Ona görə də hansısa çətinliyim yoxdu.

RÖYANƏ OĞUZ