Məlum olduğu kimi bazar günü La Liqanın 8-ci turunda Madrid derbisi baş tutacaq.

''Atletiko'' doğma ''Vanda Metropolitano''da ''Real''ı qəbul edəcək. Bu arada bu prinsipial qarşılaşma ilə bağlı maraqlı bir xəbər yayılıb. Derbinin fasiləsində tanınmış meksikalı müğənni Danna Paolanın səhnəyə çıxaraq 15 dəqiqəlik konsert verməsi planlaşdırılırdı. Amma ''Atletiko'' rəhbərliyinin qərarı ilə bu konsert ləğv edilib. Səbəb isə Paolanın ''Real'' azarkeşi olmasıdı! Bu xanım İspaniyada tanınmış aparıcılardan olan David Brankolanın verilişinin qonağı olub və məhz orda ''Kral klubu''nun fanatı olduğunu açıqlayıb. Brankola özü ''Atletiko'' azarkeşi kimi tanınır və onun ''nə üçün məhz bu oyunun fasiləsində oxumağa qərar verdin'' sualına Paola belə cavab verib: ''Real'' azarkeşi olduğum üçün! Başqa nə üçün olacaq? Çox həyəcanlıyam. Çünki ''Real''ın oyunçularını ilk dəfə canlı görəcəm''. Bundan başqa Paola derbidə ''Real''ın 2:1 hesabı ilə qalib gələcəyini proqnozlaşdırıb. Bu sözlərdən sonra ''Atletiko'' rəhbərliyi fasilədə nəzərdə tutulmuş şounu ləğv edib. Bu isə futbolsevərlər tərəfindən birmənalı qarşılanmayıb. Maraqlıdı ki, ''Real'' fanatları ikinci dövrədə oynanılacaq derbinin fasiləsində Paolanın ''Santyaqo Bernabeu''ya dəvət edilməsini təklif ediblər. Amma ''Bernabeu''da konsertlər zamanı çox səs-küy olduğundan ətraf binalarda yaşayan insanlar bundan şikayətlənir. Ona görə də yerli bələdiyyənin qərarı ilə müvəqqəti olaraq ''Bernabeu''da konsertlərin keçirilməsi qadağan edilib. Görünən odu ki, 23 yaşlı müğənni ''Real''ın oyunçularını canlı görmək arzusunu həyata keçirmək üçün hələ bir qədər də gözləməli olacaq.

ƏLİ