Misli premyer-liqasında daha bir turu geridə qoyduq.

Futbolumuzun gənc komandaları uğurlu nəticələrlə yadda qaldısa, yaşlılar, yəni “Kəpəz”lə “Neftçi” işini daha çətinə saldı. Hər iki kollektiv turnir cədvəlinin autsayderləridi. Həm “sarı-göylər”, həm də “ağ-qaralar” sürətlə uçuruma doğru gedir. Səbəblər haqda dəfələrlə yazmışıq, geninə-boyuna təhlil edib müxtəlif detalları diqqətinizə çatdırmışıq. Lakin dəyişən nəsə yoxdu. Heç kim problemi kökündən həll edə bilmir. “Neftçi” və “Kəpəz” ümumi mənzərə baxımından bir-birinə bənzəsə də, maliyyə şərtləri baxımından çox fərqlənir. Gəncəlilər kasıb, bakılılar isə yetərincə zəngindi.

Mövzuya emosional yanaşan azarkeşlərin suçu rəhbərlikdə araması, məhz onların istefa verməsini tələb etməsi anlaşılandı. Hətta “sarı-göylər”in problemi məhz rəhbərliklə bağlıdı. Etiraf edim ki, şəxsən mən gəncəlilərin söz sahibinin kim olduğunu dəqiq bilmirəm. İki variant var ki, bunlar icraçı direktor Cabir İbrahimov və İdarə Heyətinin sədri İlqar Nadiridi. Redaksiyamıza daxil olan məlumata görə, birinci bütün ipləri əlində saxlamaqla hakimiyyəti tam ələ keçirmək niyyətindədi. Ümumiyyətlə, Cabir bəy bu yöndə radikal addımlar atır. Nadirini vacib məsələlərdən uzaq tutmaqla həlledici qərarları heç kimin məsləhətinə ehtiyac duymadan özü verir. Hələ Azər Bağırovun yeni futbolçu almaq istəyinə də dodaq büzür. Onun mütəxəssisdən tələbi indiki heyətlə nəticə qazanmasıdı. Təbii ki, baş məşqçi bununla razılaşmır. Axır iş o həddə çatdı ki, Bağırov mətbuat konfransında transferlərə ehtiyac duyduğunu deyərək mövzunu ictimailəşdirdi. Bəs bu təzyiq İbrahimovu prinsiplərini çeynəməyə vadar edəcəkmi? Çox güman ki, yox.

Azər bəy təyinatından sonra “Futbol+”ə verdiyi müsahibədə söz-söhbət olan yerdə qalmayacağını demişdi. Odu ki, elə cari mövsümdə istefa versə, təəccüblənməyin. Bağırov son illərdə Tərlan Əhmədov, Azər Məmmədov və Adil Şükürov nümunələrinə şahidlik edib. Gənc və böyük hədəfləri olan mütəxəssis kimi özünü “yandırmaq” niyyətində deyil. Elə Roman Qriqorçuk da. Bəli, o gənc deyil və məhz elə bu üzdən vəzifəsini tərk etmək niyyətinə düşə bilər. Baş məşqçi bazar günü yavaş-yavaş sağlamlığını itirdiyini deməklə yanaşı, “Zirə”yə məğlub olduğuna görə üzr istədi. Dedi ki, hamımız bağışlanmağımızı istəməliyik. Bunu Qriqorçukdan başqa kim istəyir? Vallah, heç kim! “Qartallar”a məğlub olan futbolçular matç bitəndən sonra azarkeşləi görməzdən gələrək paltardəyişmə otağına yollandı. Belədə yada millimizin baş məşqçisi Fernando Santuşun davranışı düşür. Mütəxəssis Millətlər Liqasının ilk turu çərçivəsində Bakıda keçirilən oyunda İsveçə məğlub olan komandanı tərəfdarların önünə gətirdi və birlikdə olmalarına şərait yaratdı. Qriqorçuk da bunu edə bilərdi. Lakin ya ağlına gəlmədi, ya da sözünün yerə düşəcəyindən qorxdu. Bəli-bəli, qorxdu! Baş məşçqi hələ futbolçulara verdiyi tapşırıqların yerinə yetirilməsinə nail ola bilmir. Matç zamanı həm müəyyən jestlərlə, həm də qışqır-bağır salmaqla komandanı irəli səsləsə də, bir işə yaramır. Onun xüsusilə yerli futbolçulara söz keçirə bilmədiyi də məlumdu. Başda Emin Mahmudov olmaqla! Adlı-sanlı futbolçu nəinki çalışdırıcının, hətta özünün istədiyi davranışı belə sərgiləmir. Həm kapitan keyfiyyətlərini itirib, həm də sanki “Neftçi”yə qarşı üsyan edir. Ramil Şeydayev də ondan geri qalmır. Hücumçu hələ özünü yaxşı tərəfdən göstərə bilməyib. Cəmi bir dəfə fərqlənməklə azarkeşləri ümidləndirsə də, sonradan qaçırdığı təhlükəli qol vəziyyətləriylə yenidən özünü quyunun dibinə saldı. Bəs belə biabırçı durumda Roman Qriqorçuk nə işə yarayır? İnanın ki, onun əlindən heç nə gəlmir. Bəlkə də “Qarabağ”la matçdan sonra istefa verməyə hazırlaşır.

Qısası, həm “Kəpəz”in, həm də “Neftçi”nin “sıfırlanmağa” ehtiyacı var. Görünür, yaşlılar çomaqsız gəzə bilmir. Radikal qərarlar gecikdikcə uçuruma doğru növbəti addımlar atılacaq.

KƏNAN BAHADIR