“Neftçi” kimi tarixi, nüfuzlu klubun illərdi düşdüyü, daha doğrusu, salındığı böhrandan, bataqlıqdan çıxa bilməməsi hər kəsə məlumdu. Tərəfdarlar mövcud durumla barışmır, alışdıqları liderlik mövqeyinin itirilməsi ilə bağlı haqlı olaraq etiraz edir. “Neftçi” nə qədər bərbad idarə olunsa da, sadiq azarkeşlərin sayəsində mənəvi nüfuzunu, dəyərini qoruyub-saxlamaqdadı. Əks halda “ağ-qaralar” daha acınacaqlı vəziyyətdə olardı. Baxmayaraq ki, köklü klub üçün bundan o tərəfi yoxdu!

Ötən il “Avropa klubu yaradılır” diletant düşüncəsi ilə Yens Andersson bəh-bəhlə “Neftçi”yə gətirildi. Nəticədə mövsümün sonu 5-ci yer, yeni “futbol ili”nin startı 9-cu pillə... Və müqavilə müddəti başa çatmamış idman məsələlərinə cavabdeh isveçli ilə yollar ayrıldı. Niyə gətirilmişdi, niyə yola salındı?! İtirən “Neftçi”, xalqın, dövlətin pulunu qazanan əcnəbi və ona vasitəçilik edənlər oldu.

Komandanın dirçəlməsi istənilirsə, kosmetik yox, köklü dəyişiklər edilməlidi. Dəyər verən azarkeşlərin bizi, “Neftçi” adına qazanılan uğurları unutmaması qürurvericidi! Bu hiss çempionluqlar, kuboklar qədər çəkiyə malikdi və mənəvi cəhətdən əvəzolunmazdı. Dəyər verən hər bir azarkeşə ayrı-ayrılıqda öz təşəkkürümü bildirirəm. “Neftçi” şəxsi klub deyil, dövlət tərəfindən maliyyələşir və xalqa, azarkeşlərə məxsusdu! Klubu idarə edənlərin hər biri bunu dərk etməlidi!

Sadiq, kluba ürəyi yanan tərəfdarların məsləhətlərinə, tələblərinə önəm verilsəydi, komanda heç vaxt indiki vəziyyətdə ola bilməzdi. Asan iş yoxdu! İşini bacaranlar, məsuliyyətini dərk edənlər, “Neftçi”nin çəkisini bilənlər üçün klubu vaxt istəmədən qısa müddətdə dirçəltmək, liderlik mövqeyinə qaytarmaq mümkündü! Yetər ki, azarkeşlərin səsinə səs verilsin, klub dağıdıcılığı mövqeyindən əl çəkilsin!”