Legioner həyatı yaşayan azərbaycanlı futbolçulardan ümidləri az-çox doğruldan Mahir Emrelidi. O, Zaqreb “Dinamo”sundan ayrılanda vətənə dönəcəyi ilə bağlı xəbərlər yayılsa da, yenidən karyerasını ölkə xaricində davam etdirməyə qərar vardi.

Mahir artıq Almaniyanın 2-ci bundesliqasında çıxış edən köklü klublardan “Nurnberq”in uğurları üçün çalışacaq. Təbii ki, zədəsonrası bərpa prosesini keçəndən, komandaya tam uyğunlaşandan sonra. “Nürnberq”ə transferi elan olunandan sonra Mahirlə əlaqə saxlamaq üçün çox çalışsaq da, nəhayət, dünən mükün oldu.

- Karyeranı “böyük beşlik” ölkəsində davam etdirmək cəhdini alqışlayırıq. O mənada ki, ölkə ilə bağlı və ya başqa böyük təkliflərin olduğu halda, qayıtmadın, karyeranı xaricdə davam etdirməyə qərar verdin. “Nürnberq”dən başqa “böyük beşlik” ölkələrindən hansısa təklif var idi? Bu klub səni hansı cəhətlərinə görə cəlb etdi?
- Təşəkkür edirəm. Başqa təkliflərdən danışmağın artıq mənasız olduğunu düşünürəm. "Nürnberq" zədəli olduğum halda, ən çox maraq göstərən komanda oldu. Mənə güvəndiklərini göstərdilər. Yaxşı baş məşqçiləri, yaxşı rəhbərlikləri var. İstər klub prezidenti, istərsə də stadion direktoru olsun - hamısı çox peşəkar, yüksək səviyyəli insanlardı. Onlarla birgə çalışmaq mənim özümə də böyük təcrübə və motivasiyadı. Oturub düşündüm və "Nürnberq"in mənim üçün indiki vəziyyətdə ən doğru seçim olduğuna qərar verdim.

- Maraqlıdı, “Nürnberq”ə karyeranda tramplin kimi baxırsanmı? Hədəfin karyeranı Almaniya elitasında davam etdirməkdi, yoxsa burdan da başqa ölkəyə keçmək istəyirsən?
- Ümumiyyətlə, çalışıram ki, getdiyim hər bir komandada özümü maksimum göstərim, faydalı olum. O məqamda daha da yüksəklərə getmək olarsa, niyə də yox?! Amma önəmlisi getdiyim klubda az-çox yadda qalmaqdı. Fikrimi tam ora yönəltmək önəmlidi. Hazırda gələcək barədə danışmaq istəmirəm. Amma "Nürnberq" də böyük klubdu. Bunu tarix də göstərir. Ona görə də bu komanda üçün forma tərlətmək mənə çox xoşdu.


- Bildiyimə görə, çoxdankı arzularından biri də nə vaxtsa “Qalatasaray”da oynamaqdı.  Həmin arzu qüvvədə qalır, yoxsa  fikrin dəyişdi?
- Arzular dəyişir... Xüsusilə Türkiyəyə gedəndən sonra baxış bucağı da bir qədər dəyişdi. Ordakı futbola, liqaya, komandalara... Doğru olanı etmək istəyirəm. O anda doğru mənə necə gəlirsə, mən də o seçimi edirəm. Arzulara gəlincə... Yüksək səviyyədə oynayıb, elə o səviyyədə də karyerasını başa vurmaq hər futbolçunun arzusudu. Biz də çalışırıq ki, bunun üçün irəliləyək. Ümid edirəm ki, "Nürnberq"də də yaxşı mövsüm keçirəcəm və mənim üçün yadda qalan bir “futbol ili” olacaq.

- Təbii ki, biz sənin sağlıq durumuna səndən yaxşı bələd ola bilmərik. Artıq bir neçə gündü kollektivlə məşqlərə başlamısan. Nə vaxt formanı bərpa edəcəyinə, yaşıl meydana çıxacağına ümidin var?
- Aldığım zərbə, doğrudan da, xoşagəlməz zədə idi. Qazaxıstanla oyunda gözlənilməz oldu. Ondan sonra tətil oldu, bu qədər uzun çəkəcəyini gözləmirdim. Daha sonra məşqlərə başlayanda gördüm ki, ağrılarım var və ciddi şəkildə fizioterapiya lazımdı. Burda da Almaniyanın ən yaxşı həkimləri, klubun həkimləri baxdılar. Baxdılar, qərar verdilər və doğru zamanı gözlədilər. Əlbəttə, sevindirici məqam oldu ki, mənim sağlığıma çox önəm verdilər. Uzun mövsümü düşündükləri üçün tam hazır olmağımı istədilər. Ümid edirəm ki, önümüzdəki oyunlarda şans qazanmağa başlayacam. Bir həftəyə yaxındı komanda ilə məşqlərə başlamışam. Amma bu həftədən düşünürəm ki, tam şəkildə komandaya qoşula biləcəm.

- Avropanın bir neçə ölkəsində - Polşa, Xorvatiya, indi isə Almaniyada çıxış etmək imkanın oldu. Almaniyanı digər iki ölkə ilə müqayisə edə bilərsənmi, hansı özəllikləri var ki, sənin marağını çəkib?
- Dediyiniz komandalar ölkələrinin çempionları, öndə gedən və ən tanınmış komandalardı. Almaniyada bir az fərqlənir. Burda daha çox, daha məhşur komanda var. Futbol tam fərqli, rəqabət daha böyükdü. Burda favorit yoxdu. Belə bir anlayış yoxdu ki, bir komanda ağalıq eləsin. Fiziki futboldu, həddən artıq fizikiyə önəm verirlər. Hansısa klubda bu qədər məşq etdiyimi xatırlamıram. Tək mən yox, mənlə bərabər yeni transfer olunan futbolçular da eyni şeyi deyir. Maraqlısı da budu ki, Almaniyada bütün klublarda belədi. Bizim məşqçilər heyəti bundan əvvəl başqa yerlərdə çalışıb. Almaniyada futbol belədi. Məşqlər bu formadadı və öyrəşməyimiz lazımdı. Təbii ki, bizdən də bacardıqca tez ayğunlaşmağımızı istəyirlər, məşqlər ağır keçir Bununla yanaşı, bərpamıza da önəm verməliyik ki, önümüzdəki oyunlarda da tam formada olub qələbə qazanaq və yaxşı futbol nümayiş etdirək.

- Yeni ölkə, yeni klub - bunlara öyrəşmək asan olmur. Bəs azarkeşlərin sənə münasibəti necədi?
- Məni çox yaxşı qarşıladılar. İstər rəhbərlik, komanda yoldaşlarım, istərsə də məşqçilər olsun. Yeni komandadı, təzə-təzə bir-birimizə isnişməyə başlayırıq. Azarkeşlər də sağ olsunlar, xoş qarşıladılar. Onlar da səbirsizlənirlər meydanda məni görməyə. Mən də öz növbəmdə bərpama və məşqlərimə diqqət göstərməyə çalışıram ki, meydanda onların ümidlərini doğruldum. Ümid edirəm ki, bunu bacararam. Yaxşı oyun və vurduğum qollar ilə ümidləri doğruldaram.

RÖYANƏ OĞUZ