Fernando Santuş İsveçlə oyundakı penalti mübahisəsinə tam düzgün reaksiya verdi.

Oyunsonrası mətbuat konfransında demişdi ki, penalti vurmağı Emin Mahmudova tapşırmışdım. Həmin açıqlamanın pərdəarxası izahı belə idi: komandadaxili iclas olacaq, hər birindən izahat alacam, son qərarımı verəcəm. Hətta Koşitsedə oyundan əvvəl keçirdiyi mətbuat konfransında da Ramil Şeydayevin start heyətində olacağını demişdi. Slovakiya ilə oyunda nə Ramil, nə də Emin Mahmudov start heyətində göründüyündən mənzərə bütün çılpaqlığıyla ortaya çıxır: əlbəttə, portuqaliyalı mütəxəssis yığmamızı daha yaxşı nəticədən məhrum edən (hissənin sonunda hesabda biz önə çıxsaydıq. Həm psixoloji üstünlük qazanacaq, həm də rəqibi 2-ci yarıda irəli atılmağa məcbur edəcəkdik ki, belədə əks-hücumlar üçün şərait yaranacaqdı) epizodla bağlı hər iki futbolçunun izahatını dinləyib. Lakin dinlədiklərindən, xüsusən də Eminin fikirlərindən razı qalmayıb. Mən sənə sarğını da vermişəm, penalti vurmaq hüququnu da! Hansı əsas və məntiq ilə o anda topu Ramilə verdin?

Bəzən mənə elə gəlir ki, azərbaycanlı futbolçular öz üzərində əlavə çalışmamaqla yanaşı, futbolun Santuş kimi dahilərinin də karyerasına nəzər salmırlar. Yox, öyrənsəydilər, bilərdilər ki, bu adam Kriştiano Ronaldo ad-soyadlı dünya divini ehtiyat oyunçular skamyasında oturub, gözünün yaşına baxmayıb. Ardıcıl iki mövsümdə “Neftçi”ni “batıran” Emin yığmada da statusuna uyğun gəlməyən davranış göstərdi, yəni topu Ramilə verdi. Belədə cəzalanası ilk adam kapitan idi ki, cəzalandı. Slovakiyada qaş-qabağı yerlə getsə də, haqq etdiyi cəzanı almışdı. Özü yıxılan ağlamaz! Bəli, Eminlə Ramil start heyətində olsaydı, bəlkə də Slovakiyada yığmamız daha yaxşı oynayacaqdı, bəlkə də xal almaq mümkün olacaqdı. Amma yığmada adlar yox, prinsiplər önəmlidi ki, Santuş da bunu bizlərə bir daha sübut etdi.

Portuqaliyalı Koşitsedə təkcə Eminlə Ramilə yox, Amin Seydiyevə də sərt üzünü göstərdi. Bəli, Abbas Hüseynov qala-qala, “Sabah”ın müdafiəçisinə şans vermək doğru deyildi. Santuş oyunsonrası mətbuat konfransında bəndənizin bununla bağlı sualını cavablayarkən “sualınızı başa düşdüm və sualınıza hörmət edirəm, Amin Seydiyevin qırmızı vərəqə almaq ehtimalı var idi”, - deyə start heyəti ilə bağlı səhvə yol verdiyini etiraf etməsə də, Seydiyevi meydandan çıxarması da tam doğru qərar idi. Cəmi 5 dəqiqə ərzində iki “məhsuldar” səhvə necə yol vermək olar axı? Nə qədər acı olsa da, etiraf etməliyik ki, Amin komandanın axırına çıxdı. Halbuki onun kobud səhvinə qədər meydanda normal oyun gedirdi. Slovakiyanın müəyyən üstünlüyü olsa da, yığmamız da zaman-zaman təhlükəli hücumlar qururdu, xüsusən də orta sahəni asanlıqla keçirdi.

Bəli, Fernando Santuş illərdi yığılıb qalan problemləri həll etməyə çalışır. Bildiyimə, daha doğrusu, AFFA rəsmilərindən eşitdiyimə görə, işə məsuliyyətlə yanaşır, daim işdə olur, otağında lövhədə hansısa sxemlər üzərində çalışır. Onun yığmanın daha məzmunlu və intensiv, sürətli oyun göstərməsi üçün çalışdığına əminəm. Bu başqa məsələ ki, yığmanın indiki oyunçuları baş məşqçinin tələblərinini yerinə yetirməyə nə dərəcədə qadirdi?

Açığı, həm bu məqam, həm də portuqaliyalının gec-tez ruhdan düşəcəyi ilə bağlı müəyyən ehtimallarım var ki, onları da yaxınlarda sizlə bölüşəcəm. Santuşun iki mətbuat konfransında iştirak edən adam kimi müəyyən qənaətim formalaşıb....

HUŞƏNG