Məlum olduğu kimi, Bolqarıstan “Arda”sında çıxış edən Cəlal Hüseynovun son günlər “Kəpəz”ə keçəcəyinə dair iddialar dolaşırdı. Hətta oyunçunun meneceri də məlumatı təsqidləyərək Gəncə təmsilçisinin ona təklif göndərdiyini açıqladı.

U-21-in kapitanı suallarımızı cavabladı, qaranlıq məqamlara aydınlıq gətirdi.

- "Arda”da işlərin necədi? Nəticələr və hadisələrin axarı səni qane edirmi?
- "Arda"da işlərim yaxşıdı. Hər oyun meydanda oluram. Futbolçu üçün ən vacib olan da budu. Hər şey qaydasındadı. Hazırda U-21-in düşərgəsindəyəm.

- Son günlər vətənə qayıdacağınla bağlı söz-söhbət artıb. Baş məşqçi və klub ilə hansısa problemin, yaxud ortaq məxrəcə gələ bilmədiyin hal olub?
- Bəli, qayıtmaq mümkün idi. Bəzi klublarla da danışıqlar oldu. Amma ortaq məxrəcə gələ bilmədik. Buna görə keçidim baş tutmadı. Yenə də Bolqarıstana qayıdacam. Əslində heç bir problem yoxdu. Sadəcə, müəyyən ailəvi səbəblərə görə ölkəyə qayıtmaq, ailəmin yanında olmaq istəyirdim. Tək səbəb bu idi, amma alınmadı.

- Aylar öncə də sənə yerli klublardan təklif göndərildiyi deyilirdi. Amma heç biri “Kəpəz” qədər səs-küy doğurmamışdı. Niyə Gəncə klubu?
-  Düzdü, "Kəpəz"lə danışıqlar gedirdi. Amma bilmirəm bunu kim və necə yaydı. Normal qarşılayıram. Sadəcə, sonuncu klub kimi "Kəpəz"lə danışıqlar gedirdi. Ortaq məxrəcə gələ bilmədiyimiz üçün alınmadı.

- Mövsüm yeni başlayıb, hər oyun da meydandasan və hazırda komandan 8-ci pillədədi. Amma “Kəpəz” indi çətin vəziyyətdədi, yenə elitadan düşmək təhlükəsi altındadı.
- Pis başlamamışıq. Açığı, "Kəpəz"in belə vəziyyətdə olması, elitadan düşmək təhlükəsi heç fikrimdə deyildi. İki mövsüm öncə "Şamaxı"ya getmişdim. Orda heç bir qorxulu şey yox idi. Əslində "Kəpəz"dən gələn təklifə görə yox, bəzi şəxsi problemlərim olması səbəbindən ölkəyə qayıtmaq istəyirdim. Nəticə etibarilə alınmadı, ona görə də qaldığımız yerdən davam edəcəyik.

- Azər Bağırov baş məşqçi təyin olunan kimi sənə dəvət göndərdi. Əvvəldən əlaqəniz necə idi? Yoxsa bu təklif sənin üçün də gözlənilməz oldu?
- Azər müəllimə təşəkkür etmək istərdim, mənə inanıb, dəvət göndərdiyi üçün. Hətta çox çalışdı ki, ortaq məxrəcə gələ bilək. Amma bəzi məqamlara görə reallaşmadı. Əvvəlcədən heç bir əlaqəmiz olmayıb.

- Düzdü, “Kəpəz” mövzusu aydınlandı, amma “Arda”da qalmayacağın iddia edilir. Belədə Azərbaycana yaxın aylarda qayıtmağı düşünürsən, yoxsa necə?
- Çox güman, bu mövsüm "Arda"da qalacam. İrəlidə necə olacağını zaman göstərəcək.

- Bilirəm ki, karyeranı daha böyük klublarda davam etdirmək məqsədin var.
- Alınarsa, Bolqarıstandan daha yaxşı irəliləyəcəyim çempionata adlamaq istəyirəm. Bu nə dərəcədə alınıb-alinmayacaq, onu zaman göstərəcək. Açığı, heç bir xarici klubla danışığım olmayıb. Nə elə bir təklif olub, nə də başqa bir şey. U-21in düşərgəsindən Bolqarıstana qayıdacam.

- Komandan ötən mövsüm “avrokubok zonası”na düşə bilmədi. Bu məqam karyerana necə təsir edə bilər?
- Hər bir futbolçu istər ki, komandası avrokuboklara düşsün, orda oynasın. Ora daha böyük bazardı, daha çox şans var ki, özünü göstərib yaxşı yerlərə gedəsən, karyeranı irəlilədəsən. Ötən il alınmadı, bu il də eyni hədəf üçün çalışacağıq.

RÖYANƏ OĞUZ