Mbappenin PSJ-yə qarşı kini yoxdu
“Real”da yavaş-yavaş ayağı açılmağa başlayan və ilk 5 rəsmi oyunda 3 qol vuran Kilian Mbappe Fransanın “Ekip” nəşrinə açıqlamalar verib.
Qeyd edək ki, gələn həftə həm Mbappe, həm də onun sabiq klubu PSJ-nin rəsmiləri Fransa Futbol Liqasının Hüquq Komitəsində üz-üzə gələcəklər. Paris nəhəngi ünlü futbolçuya olan borcunun səbəblərinə aydınlıq gətirməli olacaq. Əks halda klubu cəza gözləyir. PSJ-nin Mbappeyə ümumilikdə 55 milyon avro borcu var. Şayiələr doğrudusa, PSJ apreldən etibarən Mbappeyə məvacib və bonusların heç birini ödəməyib. Bu üzdən ulduz futbolçu sabiq klubundan şikayət edib. 25 yaşlı forvard bu və digər məqamlar barədə açıqlamalar verərək bunları deyib:
“Bəlkə də bu cür düşünməyim yaşla əlaqəlidi. Amma başa düşürəm ki, ortada qisas hissindən söhbət getməməlidi. Ötən mövsüm baş verənlər ötən mövsümdə qaldı. PSJ ilə bağlı yalnız xoş xatirələrim var. Bu klub mənə hər şey verdi. Orda bir-birindən gözəl 7 mövsüm keçirdim. Ona görə də PSJ-yə qarşı kinim yoxdu və onlara yalnız uğurlar arzulayıram. PSJ-də ən çox hansı futbolçu məni yaxşı mənada təəccübləndirdi? Bredli Barkola. Əla oğlan və əla futbolçudu. Ümid edirəm ki, hər qolsuz oyundan sonra fanatlar və futbol ictimaiyyəti ona qarşı sərt mövqe tutmayacaq. Bredlinin inanılmaz potensialı var. İndidən bunu hiss etmək mümkündü. Amma onun əsas uğurları irəlidədi. Gələcəkdə bundan da yaxşı oynaya bilər. Son oyun istisna olmaqla onun bütün matçlarını izləmişəm. AÇ-2024? Bu haqda danışmayaq. Bu turnir artıq arxada qalıb. Bəli, ümidləri doğrultmadıq. Bu məqam komandada yer alan hər kəsə böyük üzüntü yaşatdı. Amma həyat davam edir və irəli boylanmalıyıq. Mən AÇ-ni dərhal unudub başqa məqamlara kökləndim”.
Digər xəbərlər
