Millinin oyunları ilə bağlı yaranan fasiləyə “Sumqayıt” 6 xalla 6-cı pillədə yollandı. Belə görünür ki, “gənclik şəhəri”nin təmsilçisi Konfrans Liqasındakı uğursuzluğun ab-havasından qurtula bilmir.

Komandanın kapitanı  Vüqar Mustafayevlə söhbətdə bu durumun səbəblərini öyrənməyə çalışdıq.

- İlk 5 turdan sonra “Sumqayıt” 6-cı pillədədi. Belə nəticə gözlənilən idi, yoxsa şanssızlıq da var?
- Bəli, 5 turdan sonra 6-cı pillədə qərarlaşmışıq. Açığı, daha çox xal yığmaq və yuxarı pillələrdə olmaq istərdik. Amma bu futboldu, 5 tur keçib və hələ heç nə bitməyib. Qarşıda uzun marafon var. Çalışacağıq ki, səhvlərimizi aradan qaldıraraq daha yaxşı nəticələr göstərək. Yuxarı pillələrdə qərarlaşmaq fikrindəyik.

- Millinin oyunları ilə bağlı fasilədən necə yararlanmağı düşünürsüz, qarşıdakı iki həftə toparlanmağa kifayət edəcək?
- Hər işdə bir xeyir var. Bəlkə də bu fasilə bizim xeyrimizə olacaq. Dediyim kimi, səhvlərimizi aradan qaldırmaq üçün vaxt qazanmışıq. Ümid edirəm ki, bu fasilə bizə faydalı olar. Toparlanmaq, növbəti turlarda daha yaxşı nəticə qazanmaq üçün əlimizdən gələni edəcəyik.

- Komanda Konfrans Liqasında mübarizəni dayandırandan sonra ruh düşkünlüyü, yorğunluq uzun çəkdi. Bir futbolçu kimi bunun səbəbini araşdırmısanmı?
- Ruh düşkünlüyü normaldı. Çünki başqa komandalar mərhələ adladı, amma biz bunu bacarmadıq. Onun üzüntüsu, peşmanlıq hələ də qalıb. Keçə bilərdikmi? Bilərdik. Amma qismət... Fiziki yorğunluq deməzdim, sadəcə, “Fehervar”la oyunların ab-havasından çıxa bilməmişik. Bunu tez bir zamanda unutmalıyiq. Çünki keçən keçdi, olan oldu. Gələn il də avrokuboklara vəsiqə qazanmaq üçün mübarizə aparmalıyıq.

- Samir Abasov heyətin geniş olmadığını vurğulayır. Amma ötən mövsüm də, demək olar, vəziyyət belə idi. Belədə komandanı tərk edənlərin yeni gələnllərdən daha faydalı olduğunu düşünmək olarmı?
- Başlayanda qıtlıq vardı. Amma yavaş-yavaş oyunçular cəlb olunur, heyət genişlənir. Gələnlər də yaxşı karyerası olmuş futbolçulardı, amma uyğunlaşma dövrü bitməyib. Bəziləri həmin dönəmi arxada qoyub, bəziləri bir qədər çətinlik çəkir. Ümid edirəm ki, qısa zamanda bu da aradan qalxacaq.

- Bir kapitan kimi komandanı toparlamaq üçün hansı addımlar atırsan? Ümumiyyətlə, futbolçular və baş məşqçi ilə bu mövzuda söhbətlərin olurmu?
- Tək mən yox, başqa kapitanlar da çalışır ki, komandanı toparlayaq. Ən önəmlisi əhval-ruhiyyəni yaxşı tutaq. Dediyim kimi, hələ 5 tur keçib və qarşıda uzun marafon var. Ümid edirəm ki, daha yaxşı nəticələr əldə edə biləcəyik. Baş məşqçinin də komanda ilə söhbəti olur. Konfrans Liqasındakı uğursuzluğun ab-havası qalıb, amma qısa müddətdə bunu üzərimizdən atacağıq. Tam şəkildə çempionata köklənəcəyik ki, bu mövsüm də yaxşı nəticə əldə edə bilək.

- Yenidən “avrokuboklar zonası”na düşmək istəyirsiz. Amma razılaşarsan ki, bu il çempionatın səviyyəsi fərqlidi, surpriz komandalar var...
- Əlbəttə, biz də istərdik ki, yenidən Konfrans Liqasına vəsiqə qazanaq, bu turnirdə iştirak edək. Bütün komandalar buna can atır. Alınar, ya alınmaz, bunu mövsümün sonunda görəcəyik. Amma çalışacağıq ki, əlimizdən gələni edək. Düşünürəm, bu mövsüm daha maraqlı olacaq.

RÖYANƏ OĞUZ