“Barselona” son günlərdə transfer bazarında hər kəsi təəccübləndirməkdədi.

Belə düşünmək olardı ki, İlkay Gündoğan həmvətəni Hans-Diter Flikin ideyalarının ötürücüsü və gənc komandanın dayağı olacaq. Ancaq mövsümün startından bir həftə ötməmiş komandanın ən statuslu oyunçularından biri artıqlıq etdi. “Barsa”nı tərk edən futbolçu tezliklə “Mançester Siti” ilə müqavilə imzalayacaq.

Bu tarixçə absurddu. İlkayın “Barsa” ilə müqavilə bağlaması böyük uğur sayılırdı, veteran elə ilk mövsümdə komandanın ən yaxşı oyunçusu sayıldı. Ancaq cəmi bir ildən sonra onu azad agent kimi buraxırlar. Axı bu necə ola bilər?

Əslində hər şey göründüyü qədər sadə deyil. Gündoğanın gedişinin əsas səbəbi puldu. “Barselona” hələ Dani Olmonun müqaviləsini qeydiyyatdan keçirə bilmir. Kataloniyalıların maliyyə problemləri ilə bağlı elə qəzetimizin bu sayında oxuya bilərsiz (bax: səh. 9). Klub hələ ki “1:1” qaydası ilə çalışmır, yəni elə səviyyə çıxmayıb ki, yalnız qazandığını xərcləsin. Bu isə kataloniyalıların transfer bazarında manevr imkanlarını daraldır. Sadə dildə desək, “Barselona” “transfer pəncərəsi”nin son həftəsinin startı ərəfəsində əməkhaqqı fondunu yüngülləşdirməliydi. Arauxonu zədə üzündən satmaq mümkün olmadı, De Yonq, Levandovski və Lanqlenin maaşı yüksəkdi, heç birinin getmək niyyəti yoxdu, Fati lazaretdədi. Bir sözlə, bunların heç biri ilə vidalaşmaq mümkün deyilsə, Gündoğan getməlidi.

Vergiləri də nəzərə alsaq, türkəsilli futbolçunun maaşına bir il ərzində 18 milyon avro gedib. Bu isə komandada 3-cü ən yüksək maaşdı. Yüksək ödənişli futbolçulardan birindən qurtulmaq lazım idi. Çıxılmaz vəziyyətdə qalan klub seçimi Gündoğanın üzərində saxladı.

Hərçənd belə söhbətlər də gəzir ki, məsələ təkcə İlkayın maaşı ilə bağlı deyil. Onun xanımı bildirib ki, “Barselona” ailəyə “Mançester Siti” qədər diqqət göstərmir.

Həmçinin İlkayın paltardəyişmə otağında lider kimi qəbul olunmamasıyla bağlı da şayiələr dolaşır. Guya yarımmüdafiəçi komanda yoldaşlarına münasibətdə çox tələbkar olub, bu isə kollektiv daxilində əsəbilik yaradıb. Əlbəttə, bu yöndə hələ ki elə bir təsdiqləyici açıqlama yoxdu, ancaq Gündoğanın ötən mövsüm PSJ-dən alınan məğlubiyyətdən (1:4) sonra necə qalmaqal yaratdığını xatırlayırsızmı? O, qırmızı vərəqə alan Arauxonu ictimaiyyət önündə tənqid etdi. Sonra üzr istəsə də, incikliyin izi qaldı. Komandası “el klasiko”da uduzandan sonra da bunun yolverilməz olduğunu demişdi.

“Mundo Deportivo”ya inansaq, İlkayın ayrılmasının daha bir səbəbi Dani Olmonun kluba gəlişidi. Guya Avropa çempionu komandaya qoşulandan sonra Gündoğan baş məşqçiyə lazım olduğuna əmin deyil. Bəlkə də Flik daha gənc və hərəkətli futbolçulara güvənməyi planlaşdırır, Gündoğan isə bu modelə uyğun gəlmir. İlkayı buraxmaq çox riskli qərardı, çox güman, kataloniyalılar mövsümün gedişində onun mərkəzdəki yoxluğunun acısını çəkəcək. Ancaq bu fikirlə da razılaşaq ki, Flik rəhbərliyə veteranın ona lazım olduğunu desəydi, bəlkə də saxlayardılar. “Barsa”nın 4-2- 3-1 sxemində hücumçunun arxasında oynamağa Pedri, Olmo, Fermin və Rafinya da iddialıdı.

İlkaya maraq göstərən ilk klub “Fənərbaxça” oldu. Joze Mourinyo böyük məmnunluqla belə təcrübəli futbolçunu sərəncamında görmək istəyərdi. Üstəlik Gündoğan tarixi vətəni haqda həmişə xoş sözlər söyləyir. Ancaq bu variant alınmadı: “Barsa” 15 milyon kompensasiya istədi, elə İlkay özü də Türkiyədə oynamaq niyyətində deyil. Hələ də top səviyyədə oynamağa hazır olduğunu düşünür.
Ortada karyeranda sənə ilk dəfə Çempionlar Liqasını qazandıran baş məşqçi amili də var. Xavbek onu “Siti”də gözləyib-gözləmədiklərinə əmin olmaq üçün Qvardiola ilə zəngləşdi. Pep əməkdaşlığı davam etdirməyə razılıq verdi. Çox güman, Gündoğan artıq meydanın mərkəzində həlledici fiqur olmayacaq, hərçənd Qvardiola onun gedişi ilə komandanın çox şey itirdiyini dəfələrlə vurğulayıb. İndi Kovaçiçlə Nuneş da var. Ancaq ən azı atmosfer və paltardəyişmə otağında komandaya təsir göstərmək baxımından İlkayın “Siti”yə faydası dəyəcək.
Özü də şərtlər tam üst-üstə düşür – “Barselona” bu keçidə mane olmadı, almaniyalı futbolçunu pulsuz buraxdı. Əvəzində İlkay ikiillik maaşından imtina etdi. İnternetdə artıq Mançester hava limanında çəkilən kadrlar var. Pep Gündoğanı təyyarənin pilləkənində qarşılayıb. Bəli, son bir ildə İlkay məhz belə peşəkar və isti münasibətin olmamasından əziyyət çəkib.