"Şamaxı" Misli premyer-liqasının 4-cü turunda səfərdə"Zirə"ni 1:0 hesabı ilə məğlub edib.

“Football-plus.az” xəbər verir ki, bölgə təmsilçisinin baş məşqçisi Ayxan Abbasov oyundan sonra keçirilən mətbuat konfransında jurnalistlərin suallarını cavablandırıb:

- Bugünkü qələbənizi “Zirə”nin yorğunluğuna bağlayırsız?

- Bu gün əzmkar olmasaydıq, “Zirə” ustalıq sarıdan bizdən üstün idi, rahat qalib gələrdi. Onlara imkan vermədik. Birinci hissədən daha çox razı qaldım. İkinci yarı dəyişikliklərdən sonra üstünlük rəqibə keçdi.

- “Şamaxı”nın bu mövsüm məqsədi nə olacaq?

- Bu suala hər dəfə geniş cavab verə bilərdim. Digər komandalarda işləyəndə də, bizdə sanki məqsəd istəyirlər ki, nəyisə tez bir zamanda nəticə verəsən, harasa gedəsən. Məqsəd çempionatda qalmaq, yuxarı yerlər üçün vuruşmaq, yeni oyunçular çıxarmaqdı. Bizdə U-21 millisindən üç oyunçu çıxış edir.

- Transferlər üçün pulunuz qalıb?

- Pulumuz yoxdu. Bəzən “reski” gəlir.

- “Turan Tovuz”un hazırkı uğurunda özünüzü nə qədər pay sahibi görürsüz?

- Keçən il nə qədər xalımız var idi? Yaxşı başlayıblar. “Turan Tovuz” bizim üçün rəqibdi. Danışmağım düz olmaz. Çempionat hələ qabaqdadı.

- Qələbə sizin özünüzə stimul verdi? “Qarabağ” – “Turan Tovuz” matçı haqda nə deyərdiz?

- Klublar iki cəbhədə çətinlik çəkir. “Sabah”a da aid etmək olar. “Sumqayıt” da əziyyət çəkdi, sonra toparlandı. Bura inanıb gəlmişəm. Yenidən komanda qurmaq çox çətindi. Məncə, məşqçilikdə ən çətin işlərdən biri seleksiyadı. Daha sonra komandanı inandırmaq lazımdı. Hər qələbə bütün komanda və mənim üçün böyük stimuldu. “Zirə”ni səfərdə məğlub etmək asan iş deyil. “Zirə” keçən il çox möhkəm komanda idi. Kubokun finalında oynadı. Avrokuboklarda son oyunu çıxsaq, məncə, bu il “Zirə” çox yaxşı çıxış etdi. “Zirə”nin seleksiyasına baxsaq, “Qarabağ”a başağrısı olacaq. Məğlubiyyətlər bəzən qaçılmazdı. Belə komandanı məğlub etmək bizim üçün stimuldu.