"Zirə" Konfrans Liqası pley-off mərhələsinin cavab oyununda "Omoniya"nı 1:0 hesabı ilə məğlub etsə də, iki görüşün nəticəsinə əsasən, turnirdə mübarizəni dayandırıb.

“Football-plus.az” xəbər verir ki, "qartallar"ın baş məqşçisi Rəşad Sadıqov matçdan sonra baş tutan mətbuat konfransında jurnalistlərin suallarını cavablandırıb:

- Oyun göstərdi ki, "Omoniya"nı keçmək olardı. Bir həftə əvvələ qayıtsaq, nəyi dəyişərdiz?

- Müəyyən şeylər var ki, dəyişərdim. Səfərdə daha müdafiəyəmeyilli heyət qurmalıydıq. Bizdə bəzən futbolu elə təhlil edirlər ki, reallıqdan uzaq. Baxırsan ki, o bizim qərarlarımıza təsir edir. Düzgün deyil, zəiflikdi. O məqamda nəyi düzgün görürsənsə, etməlisən. Həmin oyuna daha ehtiyatlı sistem buraxmaq istəyirdim. İki mərhələ keçmişdik. Birdən-birə elə dəyişiklik edərək bütün məsuliyyəti üzərinə götürmək çətin qərardı. Orada daha minimal hesabla uduzmaq olardı. Düzgün nəticə çıxarsaq, 6:0 da bizim üçün təcrübədi. Gələcəkdə bu mərhələyə gəldikdə, daha düzgün qərar verəcəyik.

- Komandada nə dəyişib?

- Futbolçular bir-birinə daha çox uyğunlaşırlar, oyun intizam artır. Vacib olan bunları saxlayıb, bir az inkişaf etdirməkdi. Təəssüflər olsun ki, bu mərhələyə gəlib çıxana qədər ciddi itkilərimiz oldu. Sol cinahda ötən mövsüm Məqsəd İsayev oynayırdı. Bu gün onu alışdığımız Məqsəd kimi gördük. O da formasını bərpa edib. Səfərdəki oyunda Hacıağa Hacılı isinmədə zədələndi. Özü ilə danışdıq ki, dözə bilərsən? İynə ilə oynadı. Zədə performansına təsir edirdi. Xırda detallar kimi görünə bilər. Amma təsir edən detallardı. Bu gün rəqibə rahat olmasına imkan vermirdik. "Omoniya"ya topla rahat oynamağa imkan vermək istəmirdik. Birinci oyuna qayıtsaydıq, bəzi şeyləri dəyişərdik. Təcrübədi. Sırf çempionata köklənəcəyik. "Qarabağ" da avrokubok matçı oynayıb. Heyətimizdə itkilər çoxdu, rotasiya üçün imkanımız azdı. İstədiyimiz nəticəni almağa çalışacağıq. "Qarabağ", "Sabah" və "Neftçi" çempionatın favoritidi. Belə məqamlarda dözməli, xarakter göstərməliyik.

- "Omoniya"ya 0:6 və "Şamaxı"ya 0:1 hesablı məğlubiyyətdən sonra komandanı oyuna necə köklədiz?

- Kollektivimizə güvənirəm. Ən az hazırlaşdığımız, danışdığımız oyun idi. Matçdan öncə də "ustanovka" az oldu. Taktiki tapşırıqları dünən verdik. Daha çox hər şeyi özlərinə buraxmışdım. İnanırdım ki, bu vəziyyətdən düzgün çıxış yolu tapacaqlar.

- Bundan sonra Rəşad Sadıqovun məşqçi kimi hədəfi nədir?

- İlk növbədə bu nəticələri stabilləşdirməkdi. Futbol elədi ki, dünya çempionu olursan, ikinci dəfə bunu etmək çətindi. Futbolçularında hansısa rahatlıq baş verə bilər. Hədəfim bu nəticələri stabil etmək, avrokuboklarda hər il çıxış edib, xallar toplamaqdı.

- "Qarabağ" "Dinamo"ya uduzdu, "Zirə" isə "Omoniya" səddini keçə bilmədi. İki komanda da əsəbi olacaq. Demək olar ki, tarixin ən güclü "Zirə"sini görəcəyik "Qarbağ"a qarşı?

- Tam heyətlə olsaydıq, razıyam. Üç gündən bir oynamaq çətindi. Təəssüflər olsun ki, 4-5 itkimiz var. Futbolçuların durumu sabah bəlli olacaq. "Qarabağ"la oyunda ən güclü "Zirə"ni görə bilməsək də, ən yaxşı oyunlarımızdan birini oynamağa çalışacağıq.