PSJ ardıcıl 3-cü dəfə çempion oldu və hadisələrin belə axarı artıq heç kimi təəccübləndirmir.

Yeri gəlmişkən, paytaxt klubu ölkə kubokunu da qazandı. Bu uğurda Luis Enrikenin böyük əməyi var. İspaniyalı mütəxəssis indiyə qədər müstəqil görünən ulduzları vahid komanda şəklində birləşdirə bildi. Lap tutaq ki, müntəzəm diqqət mərkəzinə düşən Kilian Mbappe ümumi fonda bir qədər seçildi. Amma PSJ son mövsümdə heç vaxt olmadığı qədər əsl komanda təsiri bağışladı. Enrike fərdi ustalıq hesabına titullar qazanan, ancaq komandadakı mühiti korlayan bir çox “zəhərli” ulduzdan qurtula bildi. Onların yerini isə əməksevər futbolçular tutdu. Vitinyanı, Uqarteni götürək. Düzdü, PSJ Çempionlar Liqasında Dortmund “Borussiya”sı ilə bacarmadı. Ümumilikdə Enrikenin yenilənmiş və Mbappe ilə vidalaşan komandasının növbəti mövsüm necə təsir bağışlayacağı maraq doğurur.

Fransada ÇL-ə qalan vəsiqələr uğrunda da amansız mübarizə getdi, son ana qədər intriqa qorundu. Mövsüm boyunca 2-ci pillə əldən-ələ keçdi. Xüsusən də mövsümün müəyyən bölümündə möhkəm müdafiəsi ilə seçilən “Nitsa”, həmçinin nəinki Fransa, hətta Avropa futbolunun əsas kəşflərindən olan “Brest” uzun müddət 2-ci yerdə qərarlaşdı. Bu komandalar 1-ci dövrədə hətta lider olmağa da imkan tapdı. Ancaq sona yaxın təcrübə önə çıxdı. Mövsümə yaxşı başlayan, ortalarda büdrəyən “Monako” sonda çempion PSJ-nin əsas izləyicisi oldu. “Brest”lə “Nitsa” mövsümün sonunda sanki “gücdən düşdü”, belədə “Lill”in 3-cü yeri tutmaq şansı artdı.
“Lill” ilə bağlı durum təzadlıdı, hətta bəzilərinə ədalətsizlik kimi də görünə bilər. Ona görə ki, komandanın oyunçu seçimi yaxşıdı, yaxşı çalışdırıcısı var, “şimallı itlər” elə meydanda da baxımlı, maraqlı oyun göstərirlər. Bir ara liderlər qrupunda möhkəmlənən “Lill” son turda “Nitsa” ilə oyunda qələbəni dramatik şəkildə əldən verərək “Brest”in ilk “3-lüy”ə qayıtmasına şərai yaratdı. Odu ki, məhz “Brest” PSJ və “Monako” ilə birgə Fransanı ÇL-in qrupunda təmsil edəcək. Belə sonucu heç kim gözləmirdi. “Lill” isə qrupa düşməkdən ötrü təsnifat mərhələsini adlamalıdı.

Avrokuboklara qalan vəsiqələrə gəlincə, “Nitsa” və “Lion” Avropa Liqasının qrupunda, “Lans” isə Konfrans Liqasının pley-offunda oynayacaq. Sonda 5-ci yeri tutan “Nitsa”dan başlayaq. “Qartallar” azarkeşlərə Fransa çempionatının keçmişini xatırlatdı. Həmin dövrü ki, oyunlar həddən artıq qeyri-məhsuldar keçirdi, 0:0 hesabı çox populyar idi. Onda, adətən, qapısını toxunulmaz saxlayan, necəsə rəqib qapısına yol tapan komandalar qalib gəlirdi. “Nitsa” çempionatın ilk yarısında məhz belə komanda idi. “Qartallar” hətta bir müddət zirvəni də heç kimə vermədi. Onların 1:0 hesablı qələbələri həm heyran edir, həm də qorxudurdu. Ancaq müasir futbol tədricən “sözünü dedi”, “Nitsa” aşağı sürüşməyə başladı. Uzun müddət 2-ci yerdə dayansalar da, mövsümü 5-ci pillədə tamamlamalı oldular.
Qeyd etmək lazımdı ki, “Nitsa” bütün qapalı oyun elementlərinə rəğmən, zaman-zaman parlaq, məhsuldar oyunların da iştirakçısı olurdu. Əslində komandanın hücum futbolu oynamağa qadir heyəti də var. Avropa Liqası “qartallar”ın özünü göstərməsi üçün ideal platformadı.

Elə “Lion” üçün də. Bu komanda ilə bağlı tarixçə daha maraqlıdı. Sahibini dəyişən “şirlər” qeyri-adi sürətlə aşağı yuvarlanmışdı. Mövsümün ilk yarısı onlar üçün, ümumiyyətlə, faciəvi keçdi. Əsrin əvvəlində titulları sıralayan klub bu dəfə elitadan düşmək təhlükəsi ilə üz-üzə idi. Belə mənzərə uzun müddət davam etdi. Yalnız Pyer Saj baş məşqçi postuna dəvət olunandan sonra “şirlər” üçün intibah dövrü başladı. Bundan başqa, qışda heyətdə də sabitlik yaratmaq mümkün oldu. Məşqçi korpusu sərəncamında olan futbolçularla ciddi şəkildə çalışmağa başladı. Onların bir çoxunun səviyyəsi, yumşaq desək, klubun əvvəlki şan-söhrətinə uyğun olmasa da belə...

Lazımi anda “Lion”u arxasınca daşıyan liderlər tapıldı. Əlbəttə, söhbət ilk növbədə Lakazettdən gedir. “Lion” mövsümün 2-ci yarısının ən yaxşı komandalarından oldu. “Şirlər” ölkə kubokunun finalında PSJ-nin öhdəsindən gələ bilməsələr də, çempionatda yanvarda fantastik hədəf kimi görünən 6-cı yeri tutdular. Fransanın avrokuboklardakı 7-ci təmsilçisi isə “Lans”dı. Əvvəlki mövsümün əsas kəşfi olan “qan-qızılılar” bu dəfə mövsümün əvvəlini boşa verdilər. Bu üzdən sonda “Marsel”i qabaqlayıb 7-ci yeri tutmalarını da müəyyən mənada uğur saymaq olar.

Son mövsümü boşa verən komandalara da toxunaq. Aşkar autsayder “Klermon” ilə “Loryan” birbaşa aşağı dəstəyə yuvarlandı. “Mets”i isə “Sent-Etyen”lə pley-off oyunları gözləyirdi. Burda artıq futbolun ironiyasını bütün çılpaqlığıyla gördük. “Sent-Etyen”in evdə 2:1 hesabıyla qələbə qazanması dünyanın sonu deyildi. Amma “Mets” evdəki cavab görüşünün artıq 6-cı dəqiqəsində Pap Dyallonun meydandan qovulması üzündən azlıqda qaldı. Bununla belə, meydan sahibləri 25-ci dəqiqəyə qədər iki qol vurdular. “Sent-Etyen” fasiləyə qədər bunlardan birinin əvəzini çıxa bildi. Əlavə vaxtın sonunda hesabı bərabərləşdirən “Sent-Etyen” iki oyunun nəticəsinə görə elitaya yüksəldi. “Mets” isə artıq Liqa 2-də mübarizə aparacaq. Hərçənd bu komandanın aşağı dəstəyə yuvarlanmasına yananlarla müqayisədə “Sent-Etyen”in elitaya dönüşünə sevinənlərin sayı daha çoxdu.