“Kəpəz” Misli premyer-liqasının 3-cü turunda "Turan Tovuz"a uduzdu - 0:3.

“Football-plus.az” xəbər verir ki, Gəncə təmsilçisinin baş məşqçisi Adil Şükürov oyundan sonra keçirilən mətbuat konfransında jurnalistlərin suallarını cavablandırıb:

- Yeni komanda qururuq. Kollektivin özünə gəlməsi üçün vaxt lazımdı. Müddət yeni qoşulan futbolçuların uyğunlaşmasından asılıdı. Əvvəlki oyunlara nisbətən yaxşıya doğru cüzi irəliləyiş hiss etdim. Doğrudu, məğlub olmuşuq. Amma qarşıdakı oyunlarda daha yaxşı olacaq.

- Ev oyununuzu səfər kimi keçirdiniz. Bu, komandanın oyununa necə təsir edir?
- Keçən ildən bəri eyni vəziyyətdi. Hələ ki, stadionumuz yoxdu. Gəncədə oynasaq, fərqli olar. Azarkeşlər bura gəlir, komandaya dəstək olur və gözləntiləri yüksəkdi. Amma komanda formalaşmalıdı.

- Ötən turda zədələnən əsas qapıçınız Rojerio Santosun durumu necədi?
- Sağ ayağında problem var. İnşallah ki, gələn həftə bizə qoşular.

- Bu legionerlər "Kəpəz"ə nə fayda verirmi? Olmazdı ki, onların əvəzinə "Şamaxı" kimi yerli, tanıdığınız oyunçular transfer edəsiz?
- "Şamaxı" həmin vaxt aşağı liqaya düşdü. Biz bunu istəmirik, düşməyəcəyik də. Komanda yenidən qurulur. İstəmirəm komanda aşağı düşsün. Komandanın oyunu alınmalıdı. Futbolçuların bir-birini başa düşməsi, anlaşması lazımdı. Hələ də yeni futbolçular cəlb edirik. Bir komandanın formalaşması üçün ən azından 2 il vaxt lazımdı. Ancaq bu il istəyirik ki, elitada qalaq.

- Sizin üçün hazırki durumda “Kəpəz”ə sponsor tapılması önəmlidi yoxsa elitada qalması?
- Elitada qalmaq.

- Komandanın hazırki durumunu nəzərə alsaq, nə çatışmır?- Klub olaraq, üzərimizə düşən sənədləşmə məsələlərini vaxtında yerinə yetirməliyik. Braziliyadan futbolçu sifariş etmişdik. Hər şey hazır idi. Şəxsən klub prezidentimiz İlqar Nadiri miqrasiya məsələlərini həll edirdi. Lakin son anda alınmadı.

- Sizcə bu gedişlə komandanın premyer-liqada qalması, ötən illə müqayisədə daha çətin deyilki?
- Onsuz bura gələndən bəri işimiz çətindi. İstirahətə gəlməmişik. Keçən ilki büdcəylə indiki arasında 200 min manat fərq var. Bizim kimi klub üçün bu, böyük rəqəmdi. Transfer büdcəmiz 800 min manatdı.

KAMAL SƏFƏR