"Kəpəz" Misli premyer-liqasının 2-ci turunda səfərdə "Qarabağ"a 0:3 hesabı ilə məğlub olub.

“Football-plus.az” xəbər verir ki, Gəncə təmsilçisinin baş məşqçisi Adil Şükürov oyundan sonra keçirilən mətbuat konfransında jurnalistlərin suallarını cavablandırıb:

- Yeni qurulan komandayıq. Yeni oyunçular gəlib. Komanda formalaşdırmaq müəyyən vaxt alacaq. Belə nəticələrin olması da təbiidi. Komandanı daha da yaxşı vəziyyətə gətirməyə çalışırıq. Ötənilki kimi mübariz komanda formalaşdırmaq istəyirik. Bu yöndə də işimiz davam edir.

- Danışıq apardığınız futbolçu var?

- Bir nəfər var. Keverton bizimlədi. Çalışacağıq ki, gələn həftə sifariş edək, oyunlarda iştirak etsin.

- Komandanı qurmaq üçün nə qədər vaxt lazımdı?

- Özüm komandaya inanmaq istəyirəm. Məşqçi olaraq komandaya inanmalıyıq. "Kəpəz" elə-belə komanda deyil, tarixi klubdu. Azarkeş də bu məğlubiyyəti qəbul etmir. Biz də etmirik, istəmirik. Məğlubiyyətlər acıdı. Futbolçuların psixoloji durumlarını düzəltmək istəyirik. Hər kəs istəyir ki, əvvəlki komanda qurulsun. Ötənilki komandanın demək olar ki, 80-90 faizi yoxdu.

- "Kəpəz"in oyunçularını premyer-liqanın digər klubları götürür. "Zirə" üç futbolçunuzu transfer etdi. Ola bilər ki, bu fubtolçularla uzunmüddətli müqavilə imzalayasız?

- Bu yöndə də işlərimizi aparırıq. Əksər oyunçularla 1+1 şərtilə müqavilə imzalayırıq ki, gələn il komandanı gücləndirək. Futbolçularla 3 illik müqavilə imzalamaqla deyil, müqavilə şərtlərini yerinə yetirmək lazımdı. Komandaya dəstək olmalıdı. Olmayanda, istəyirsən 10 illik müqavilə imzala, əhəmiyyəti qalmır. Futbolçunu saxlamaq üçün müəyyən artım olmalıdı. Ödəyə bilmiriksə, komandanın aparıcı oyunçuları gedir. Tam başqa fikirləşirdik, başqa şeylər qarşımıza çıxdı. Hər kəsdən də istəyirəm ki, mübariz "Kəpəz" üçün səbirli olsun.