Bax getdi və ...ağladı
Şənbə günü Parisdə Beynəlxalq Olimpiya Komitəsinin (BOK) 142-ci sessiyası keçirilib.
Sessiyada BOK-un prezidenti, səlahiyyət müddəti gələn il bitəcək Tomas Bax yeni müddətə bu posta namizədliyini irəli sürməyəcəyini bildirib:
“Sizin bütün şərhlərinizi və dəlillərinizi yüksək qiymətləndirirəm. Dərin düşüncələrdən və geniş diskussiyalardan, bu zalda olan ailə üzvlərimlə məsləhətləşəndən sonra bu nəticəyə gəldim ki, səlahiyyət müddətimi uzatmağa dəyməz”.
Bax yeni müddətə namizədliyini irəli sürməyəcəyini açıqlayandan sonra göz yaşını saxlaya bilməyib:
“Bu qərarla çoxlarınızı məyus etdiyimi bilirəm. Ancaq əmin edirəm ki, bu qərar olimpiya hərəkatının maraqlarına xidmət edir. Olimpiya hərəkatının yeni liderinə hakimiyyətin keçməsi yumşaq xarakter daşıyacaq”.
BOK-un yeni prezidenti qurumun gələn ilin martında Yunanıstanda keçiriləcək sessiyasında seçiləcək. Bax Olimpiada-1976-da qılıncoynatma yarışlarının qalinidi. 70 yaşlı mütəxəssis 2013-cü ilin sentyabrından bəri BOK-a rəhbərlik edirdi. O, sonuncu dəfə 2021-ci ildə daha 4 il müddətinə bu vəzifəyə seçilmişdi.
Digər xəbərlər
