Misli premyer-liqasında 2-ci tura yekun vuruldu.

"Turan Tovuz"un aparıcı futbolçularından Otto Con “Futbol+”in bəzi suallını cavabladı.

- Yeni mövsümlə bağlı gözləntilərini bilmək istərdim.
- İlk oyunlar həmişə çətin olur. Ümumilikdə bizim üçün yaxşı keçdiyini demək olar. Sadəcə, çox məşq etmək və komandama kömək etmək istəyirəm. İlk görüşdən çox danışmaq fikrim yoxdu. Hələ ki gözləntilərdən danışmaq tezdi.

- “Neftçi” ilə səfər görüşünüzdən sonra çoxları stadionun ot örtüyündən şikayətləndi. Bu məqam oyununuza nə dərəcədə mane oldu?
- Bəli, həmin gün meydança pis idi və bu da oyuna ciddi təsir etdi. Bir az təəccübləndim, çünki ötən mövsüm həmin qazon yaxşı idi.

- Heç-heçə ədalətli nəticə oldu?
- Deyərdim ki, bəli.

- Yeni məşqçinin taktikasına və tələblərinə öyrəşmisiz? Onun gəlişi ilə klubda hansı yenilik oldu, hansı cəhəti vurğulayardın?
- Bəli, hər gün daha artıq dərəcədə öyrəşirəm. Əsas fərq nizam-intizamla bağlıdı.

- Bir müddət əvvəl klubla aranda maliyyə probleminin olduğu deyilirdi. Yəni sən daha artıq maaş tələb etmisən.
- Mənlə klub arasında heç vaxt maliyyə problemi olmayıb. Deyilənlər doğru deyil.

- “Sumqayıt”la oyuna hazırlıq necə gedir?
- Yaxşı hazırlaşırıq, çox çalışırıq. İnşallah, maksimum xal toplayacağıq.

- “Turan Tovuz”la yanaşı, başqa komandalar da güclənib. Rəqabətə tap gətirmək və yuxarı pillələrdə yer almaq çətin görünmür?
- Futbol rəqabətdən ibarətdi. Düşünürəm ki, mübət yöndə işlər davam edir və zaman keçdikcə daha da yaxşılaşacağıq.

- Mövsümün sonunda Konfrans Liqasına vəsiqə qazanacağınıza  nə dərəcədə inanırsan?
- Hələ ki mövsümün başlanğıcıdı. Ona görə də bu barədə şərh vermək tezdi. Lakin komanda olaraq, bunun üçün əlimizdən gələni edəcəyik.

- Avrokuboklarda iştirak edən "Qarabağ", "Sabah" və "Zirə"dən hansını izləyir və mərhələ keçəcəyinə inanırsan?
- Bütün oyunları izləməyə çalışıram. “Qarabağ”a, “Sabah”a və “Zirə”yə uğurlar arzulayıram. Hər birinin növbəti mərhələyə keçmək şansı var.

RÖYANƏ OĞUZ