Fransada keçirilən 33-cü Yay Olimpiya Oyunlarında ilk tam həftə arxada qaldı.

Belə demək mümkünsə, maraqlı hadisələrin sayı-hesabı yoxdu. Fransalı üzgüçü Leon Marşan nə az, nə çox – 4 qızıl medal qazandı. 22 yaşlı atlet 200 və 400 metr məsafəyə kompleks yarışında, eləcə də batterflyay (200 m) və brass (200 m) üslubu ilə üzməkdə hamını qabaqladı. Marşan Fransa tarixinə bir Olimpiadada 4 “qızıl” qazanan ilk idmançı kimi düşdü. Veloyürüşçü Pol Masson (Afina-1896), dağ xizəkçisi Jan-Klod Kiyi (Qrenobl-1968) və biatlonçu Marten Furkad (Pxençxan-2018) bir Olimpiadada 3 “qızıl” qazana bilmişdi.

Əlbəttə, Paris Olimpiadasının başqa qəhrəmanları da var. Qadın atlet Jülyen Alfred 100 metrə qaçışda hamını qabaqlamaqla Sent-Lyusiyaya Olimpiadalar tarixində ilk medalı qazandırdı. O, finişə 10,72 saniyəqə çatdı. Əlcəzairi təmsil edən gimnast Kayliya Nemur isə təkcə ölkəsinin yox, Afrikanın da tarixinə düşdü. 17 yaşlı idmançı müxtəlif hündürlüklü qollarda çıxış zamanı 15,700 bal topladı. Nemur Olimpiya Oyunlarında idman gimnastikasında qızıl medal qazanan ilk Afrika təmsilçisidi. Onun əvvəllər Fransa yığmasında çıxış etdiyini, ancaq bu ilin yazında idman vətəndaşlığını dəyişməyə qərar verdiyini də xatırladaq.

Və əlbəttə, bazar gününün qəhrəmanlarından biri olan əfsanəvi Novak Cokoviç haqda danışmalıyıq. Serbiyalı tennisçi finalda ispan həmkarı Karlos Alkarası məğlub edə bildi – 7:6 (7:3), 7:6 (7:2). 37 yaşlı Cokoviç Açıq erada “Böyük dəbilqə” seriyalı 4 turniri, Olimpiadanın qızıl medalını və ATP-nin illik Yekun turnirini qazanan ikinci tennisçidi. Birinci isə amerikalı Andre Aqassi olub.

Cokoviçin indiyə qədər Olimpiadalarda ən yaxşı nəticəsi bürünc medal (Pekin-2008) olmuşdu. O, tarixə kişilər və qadınlar arasında qızıl medal qazanan ən yaşlı tennisçi kimi də düşdü. Bazar günü Novak 37 yaş 74 günlük idi.

Alman jokey İzabel Virt atçılıq üzrə komanda yarışlarında qızıl medal qazanmaqla 7 Olimpiadada çempion olmağı bacaran ilk idmançı kimi tarixə düşdüb. 55 yaşlı jokey ilk olimpiya çempionluğunu 32 il əvvəl - 1992-ci ildə Barselonada qazanmışdı. Bu, bir idmançının ilk və son çempionluğu arasında ən böyük zaman fərqidi. Virt indiyədək Olimpiya Oyunlarında 8 qızıl, 5 gümüş medal qazanıb.
Olimpiada ətrafında xoşagəlməz əhvəlatlar da yaşanır. Məsələn, iyulun 26-da keçirilən açılış mərasiminə prodüserlik edən şirkət haqq-hesab çəkiləcəyi ilə bağlı çoxsaylı təhdidlər üzündən polisə şikayət ərizəsi yazıb. “Le Parisien” xəbər verir ki, avqustun 2-də şirkət bədii rəhbər Tomas Collinin və aparıcı direktorların ünvanına təhqirlərin və təhdidlərin yer aldığı bir neçə məktub alıb.

Xatırladaq ki, həmin mərasim xüsusən də xristian dünyasında qəzəb doğurmuşdu. Bir çox məşhurlar, eləcə də amerikalı sahibkar İlon Mask təşkilatçıları xristianlara hörmətsizlikdə suçlamışdı. İdmançıların paradaı zamanı isə diktor Koreyadan olan nümayəndə heyətini KXDR təmsilçiləri kimi təqdim etmişdi.