“Əfsuslar olsun ki, “Sumqayıt” Konfrans Liqasında mübarizəni dayandırdı. Buna baxmayaraq, Samir Abasovun yetirmələri cavab matçında heç də pis təsir bağışlamadı. Komandanın növbəti mərhələyə adlamaq üçün 30 faiz şansının qalması elə Sumqayıtda keçirilən ilk görüşdə qırmızı vərəqənin olmasına görə idi. Düşünürəm ki, “kimyaçılar” həmin oyunda qələbə qazana bilərdi. Oyuna gəlincə, doğrudu, son 11 dəqiqədə “Fehervar” azlıqda mübarizə apardı. Lakin “Sumqayıt” bunu dəyərləndirə bilmədi. Futbolda belə şeylər olur. Ancaq düşünürəm ki, təmsilçimiz hücumlarının sayını artırsaydı və irəlidə daha fəal olsaydı, nəsə edə bilərdi. Təəssüf ki, olmadı... Artıq çempionatın yeni mövsümü start götürür. Samir Abasovun yetirmələri yeni mövsümə köklənməlidi. Əlbəttə, “Sumqayıt”ın Avropada qalıb, növbəti mərhələyə vəsiqə qazanmasını istəyərdik. Lakin nə etmək olar…”

“Həmin günü ölkə futbolu adına uğurlu gün saymaq olar. Çünki həm “Zirə”, həm də “Sabah” növbəti mərhələyə adladı. Əlbəttə, onların qrupa düşməsini hamımız istəyirik. Ancaq Hayfa “Makkabi”sinə qarşı “Sabah”ın mübarizəsini götürsək, deyərdim ki, bəxt də Masazır təmsilçisinin üzünə güldü. Hər iki komanda yaxşı mübarizə apardılar. Lakin müdafiədə həddən artıq böyük səhvlər oldu deyə 6 qol buraxdılar. Buna baxmayaraq, mərhələni adladılar. Təbii ki, buna sevinirik. Qarşıdakı oyunda da “Sabah”ın müdafiə xəttində düzəlişlər edilməsə, böyük problemlərlə üzləşəcəklər. “Zirə”yə gəlincə, həm ev, həm də səfər görüşündə layiqli qələbə qazandı. Növbəti mərhələdə də təmsilçilərimizə uğurlar arzulayıram”.