2022-ci ilin fevralından bəri Rusiyanın işğal planlarının hədəfinə çevrilən Ukrayna daha bir futbol mövsümünü arxada qoydu.

Müharibəyə cəlb olunan ölkədə çempionatın təşkili ilə bağlı çoxlu texniki xarakterli problem yaranır, son mövsümün gedişində də dəfələrlə həyəcan siqnalı ilə oyunlar dayandırıldı. Hər halda, mövsümü başa çatdırmaq mümkün oldu. Və “Şaxtyor” müstəqillik tarixində 15-ci dəfə çempionluğu bayram etdi.

Vaxtilə bizim “İnter”də baş məşqçinin köməkçisi işləyən Marino Puşiç ötən ilin oktyabrında “şaxtaçılar”ın “sükanı arxasına” keçəndə çempionluğa şübhə edənlərin sayı çox idi. Axı bosniyalının məşqçi kimi hansısa uğurunu görməmişdilər. “Şaxtyor” onun rəhbərliyi altında keçirdiyi ilk oyunlarda, doğrudan da, problemlərlə üzləşdi. Donetsk klubu "Dnepr-1"ə uduzdu (1:3), “Polesye” ilə qolsuz heç-heçəyə razılaşdı. Amma dekabrın 3-də “Metallist 1925” üzərindəki qələbə ilə 15 oyunluq məğlubiyyətsiz seriyanın əsası qoyuldu.
Mövsüm ərzində müxtəlif komandalar zirvəyə qalxsa da, hər kəsə aydın idi ki, çempionluq mübarizəsi əzəli rəqiblər – “Şaxtyor”la “Dinamo” arasında gedəcək. Belə də oldu: çempionun adına bu komandalar arasında mayın 11-də keçirilən oyunda aydınlıq gəldi. Sudakovun 33-cü dəqiqədəki penalti qolu ilə önə keçən “şaxtaçılar” titulu əldən vermədi. Ədalət naminə deyək ki, “Dinamo” da çempionlara xas qrafik cızdı. Kiyev klubunda da payızda məşqçi dəyişikliyi yaşandı. Noyabrın 4-də baş məşqçi postunda Mirça Luçeskunu əvəz edən Aleksandr Şovkovski sonuncu dəfə 2021-də çempion olan komandanın bu uğuru təkrarlaması üçün əlindən gələni əsirgəmədi. “Dinamo” onun dönəmində 17 oyunluq qələbə seriyası yaxaladı, ümumiyyətlə, 20 oyunun yalnız birində uduzdu. “Aleksandriya”dan alınan texniki məğlubiyyət olmasaydı, bəlkə də biz mövsümün sonunda “qızıl oyun” izləyəcəkdik.

“Dinamo” 71 qolla son mövsümün ən məhsuldar komandası oldu. Təsadüfi deyil ki, mövsümün ən çox qol vuran oyunçuları sırasında kiyevlilərin üç təmsilçisi – Vanat, Buyalski və Yarmolenko var. Yalnız iki komanda (“Dinamo”dan başqa “Şaxtyor”) mövsümün hər oyununda orta hesabla 2-dən artıq qol vurdu. Amma təkcə çox qol vurmaq hesabına çempion olmaq mümkün deyil. Bunun üçün müdafiən də möhkəm olmalıdı. “Şaxtyor” bu mənada son mövsümdə “Dinamo”dan bir addım öndə idi. Puşiçin komandası cəmi 24 qol buraxıb, 14 oyunda qapısının toxunulmazlığını qoruyub. Göründüyü kimi, “Dinamo”da top fərqi daha yaxşı (+44) olsa da, çempionluğu məhz “Şaxtyor” qazandı.

Ölkə futbolunun nəhənglərinin əbədi çempionluq intriqası öz yerində, amma 3-cü yer uğrunda da gərgin mübarizə getdi. Və bu mübarizədən “Dnepr-1”i qabaqlayan “Krivbass” qalib ayrıldı. Krivoy-Roq klubunu 2022-ci ildən bəri Yuri Vernidub çalışdırır. Komanda məhz onun rəhbərliyi altında 2000-ci ildən bəri ilk dəfə mövsümü mükafatçılar sırasında bitirdi. Düzdü, Vernidub və yetirmələri daha yüksək yer tutmaq həvəsini gizlətmirdi. Bu mənada bürünc medal onları razı salmadı. Baş məşqçi son müsahibələrində yeni mövsümdə çempionluq uğrunda oynayacaqlarını deyib.

Mövsümü uğurlu keçirən komandalar sırasında “Dnepr-1” ilə Emil Mustafayevin də şərəfini qoruduğu “Polesye” də var. “Dnepr-1” Konfrans Liqasına vəsiqə qazansa da, sonradan hansı problemlərlə üzləşdiyini bilirsiz, “Futbol+”in səhifələrində artıq bu haqda yazılıb. Elitanın debütantı olan Jitomir klubunun isə “boyundan yuxarı tullandığını” deyə bilərik. “Polesye” artıq avrokuboklarda da debüt edib.
Qalan komandaların çıxışına gəlincə, aşkar uğursuzlardan biri “Zarya”dı. Luqansklılar 2022/23 mövsümünü bürünc medalçı kimi bitirsə də, bu dəfə 10-cu yerlə kifayətləndi. Yuri Kovalın çalışdırdığı komanda xüsusən də mövsümün ilk yarısında biabırçı təsir bağışladı. Zədəlilərin çoxluğu fonunda bəlkə də belə nəticə gözlənilən idi. Yalnız yazda vəziyyəti qaydasına salmaq mümkün oldu ki, onda da “Zarya” üçün qatar getmişdi.

Artıq “Neftçi”nin “sükanı arxasında” olan Roman Qriqorçukun çalışdırdığı “Çernomorets” mövsümə yaxşı başlasa da, sonradan oyun və nəticə baxımından ciddi eniş yaşadı. “Dənizçilər” elitada yerini qoruya bildi. Bununla belə, “Çernomorets” tarixində ilk dəfə bir mövsümdə 18 oyunda məğlubiyyətlə üzləşdi.

Hər oyuna orta hesabla bir qol vurmağı bacarmayan komandalar da var. Bunlar “Zarya”, “Minay”, “Kolos” və “Obolon”du. “Obolon”la bağlı başqa bir statistik incəlik də var: “pivəçilər” mövsüm ərzində keçirdiyi oyunların üçdəbirində rəqib qapısına yol tapa bilməyib. Bu komanda ilə yanaşı, “Veres” də pley-off oyunlarından qalib ayrılmaqla elitada yerini qorudu. Ümumiyyətlə, bu səhifədəki “kim hara?” yarımsərlövhəsinə nəzər salsaz, çox maraqlı mənzərə ilə üzləşəcəksiz. Aşağı liqaya düşən komandalar sırasında “Minay” ilə “Metallist 1925”i göstərmişik. Ancaq “Dnepr-1”in gözlənilmədən elitadan uzaqlaşdırılması vəziyyəti dəyişdi. Faktiki “Minay”ın da gələn mövsüm elitada oynaması mümkündü. Soruşacaqsız ki, necə? Buyurun, baxın.

Premyer-liqada 13-14-cü yerlərdə qərarlaşan “Veres” ilə “Obolon” 1-ci liqada “Episentr” və “Levıy Bereq” ilə pley-offda qalib gələrək yerini qoruyub. “Dnepr-1” müflislik üzündən elitadan kənarlaşdırıldığından Ukrayna Futbol Federasiyası “Minay”, “Metallist 1925”, “Episentr” və “Levıy Bereq” arasında mini-turnir keçirib. Yarımfinal: Levıy Bereq – Metallist 1925 1:1, p. – 5:4, Episentr – Minay 3:3, p. – 3:5. İyulun 30-da keçiriləcək final oyununun qalibi gələn mövsüm premyer-liqada oynayacaq.