“Karyeram boyunca gözəl şeylər yaşamışam. Bunlara nail olmaq üçün çox çalışmışam. 18 ildi peşəkar futboldayam və bu müddətdə etdiyim fədakarlıqların mənə böyük faydası dəyib. Uzun illər, demək olar, zədələnmədim. Orta hesabla hər mövsüm 40-dan çox oyun keçirirdim. Yalnız Trabzona gələndən sonra qolumun qırılması məni bir qədər çətinə saldı. Amma futbolda belə şeylər olur. Geriyə boylandıqda karyeramda heç nəyi dəyişmək istəməzdim. Çünki gördüyüm bütün işlərdən razıyam. “İstanbul BŞ”də bütün hədəflərimə çatdım. Bəlkə də kimlərsə deyə bilər ki, böyük komandaya transfer olunmaq hədəfinə bir qədər gec nail oldum. Amma mən məsələyə belə yanaşmıram. Yaxşı ki, “Trabzonspor”a gəlmişəm. Burda 2,5 il ərzində gözəl şeylər yaşadım və yaşamaqda da davam edirəm. Abdulla Avcının yeri mənim üçün ayrıdı. Futbolu və sistemi faktiki “İstanbul BŞ”də məhz onun başçılığı altında öyrəndim. Kiçik detalların futbolda nə qədər önəmli olduğunu anlamağa başladım. Komandanı necə idarə etmək lazım olduğunu gözəl bilən məşqçidi. Onuaçu ilə yenidən birlikdə oynamaq istərdim. Ötən mövsüm onunla birlikdə gözəl şeylər ortaya qoyduq. Bunu yenə də davam etdirə bilərik. Təkcə fiziki cəhətdən yox, xarakter baxımından da güclüdü. Futbolda bəzən ən yaxşı transfer mövcud heyəti qorumaqdı. Ona görə də Onuaçu bizim üçün önəmli futbolçudu. Türkiyə AÇ-2024-də əla təsir bağışladı. Həm Avstriya, həm də Niderlanda qarşı çox yaxşı oynadılar. Komanda üçün neqativ deyilə biləcək heç bir söz yoxdu. Türkiyədə çox əla bir nəsil yetişib. DÇ-2026-da daha da irəli gedə bilərlər. Amma bunun üçün ilk növbədə bütün ölkə bu gənclərin arxasında durmalıdı. İndi bütün diqqətimi “Trabzonspor”la daha bir çempionluq qazanmağa yönəltmişəm. Mənə “Trabzonspor”la bu mövsüm çempion olacaqsan, amma gələn yay karyeranı bitirməlisən” desələr, düşünmədən razılaşaram. Heç vaxt uzunmüddətli planlar quran futbolçulardan olmamışam. Amma yeni mövsümdə həqiqətən də çempion olmağı çox istəyirəm. Çempion olduğumuz mövsümdə “Trabzonspor”un ən böyük gücü fanatlar idi. Ona görə də indidən üzümü azarkeşlərimizə tutmaq istəyirəm. Bu mövsüm bizə həmişəkindən daha da çox dəstək verməlidilər. Çünki onlarla birlikdə daha da güclü oluruq və buna ehtiyacımız var”.