Bilindiyi kimi, futbolumuzun Avropadakı qüruru “Qarabağ” bu gün Çempionlar Liqasının 2-ci təsnifat mərhələsi çərçivəsində “Linkoln”la cavab görüşünə çıxacaq.

Cəbəllütariq təmsilçisini səfərdə məğlub etməyi bacaran Qurban Qurbanovun komandası bu cütün taleyini böyük ölçüdə müəyyənləşdirib. “Köhlən atlar” səfərdə “qırmızı şeytanlar”dan üstün olmağı bacarıbsa, cavab görüşündə doğma azarkeşlərin önündə çıxış etmək onların dəstəyi ilə daha yaxşı şəkildə oyuna köklənmələrinə və motivasiyalarının yüksəlməsinə səbəb olacaq. Klubun yaydığı son məlumata görə, artıq 16300 bilet satılıb. Bu isə öz növbəsində sektorların yarısının dolacağı deməkdi. Nə qədər qənaətbəxş rəqəm sayılsa da, Avropada qürurumuz olan klub üçün bu da azdı. Düşünürəm ki, tribunaların ən azı 80-90 faizi dolmalıdı. Ki, komanda nəinki qrup mərhələsində, adicə təsnifat oyununda belə azarkeşlərin daim onun yanında olacağına arxalansın. Futbolumuzun inkişafını istəyiriksə, əlimizdən gələn qədər də dəstək olmalıyıq. Əlbəttə, oyunları daha da maraqlı edən amillərdən biri komandanın meydandakı mübarizəsiyə yanaşı, tribunaların çılğınlığıdı. Necə ki, bunu Dortmund “Borussiya”sının, İtaliya “Roma”sının, “Latsio”sunun, Türkiyə nəgənglərinin matçlarında görmüşük. “Onsuz da “Qarabağ” keçəcək” və ya “O qədər də ciddi mərhələ deyil” düşüncəsindən çıxıb, ölkəmiz adına olan hər oyuna daha emosional yanaşmalıyıq. Onu da unutmayaq ki, bu azarkeşin “Qarabağ”a vəfa borcu var. Ağdam klubu sonuncu avrokubok oyununda – martın 14-də “Bayer-04” ilə qarşılaşmada ortaya qoyduğu mübarizə əzmi ilə sevgini də, dəstəyi də haqq edib.

Dediklərim təkcə “Qarabağ” yox, elə Konfrans Liqasının 2-ci təsnifat mərhələsində mübarizə aparan komandalar üçün də keçərlidi. “Zirə”nin “DAK 1904”ü darmadağın etdiyi oyunda tribunaların bomboş olduğunu görmək heç də xoş deyildi. “Sumqayıt”ın “Fehervar”a məğlub olmasına baxmayaraq, sektorların dolması və anşlaq yaşanması matça ayrıca ləzzət qatırdı. Cümə axşamı “Sabah” da səfərdə darmadağın etdiyi Hayfa “Makkabi”siylə evdə qarşılaşacaq. Bu oyunda da təmsilçimizi yalqız qoymayaraq, bacardığımız qədər stadionu doldurmağa çalışmalıyıq. Avrokuboklarda mübarizə aparan bütün klublarımıza uğur arzulayıram. O uğurun bir parçası da olmaq istəyiriksə, bunu sözlə yox, ən azı əməllə, tribunadan dəstək verməklə edə bilərik.

KAMAL SƏFƏR