“Nəhayət, çoxdan gözlədiyimiz sədr seçildi. Qismət olsa, komitədəki işinə də başlayar inşallah. Bu təyinata heç də təəccüblənmədim. Təəssüf ki, iki əcnəbini bu posta təmtəraqla dəvət edərək, ictimaiyyətə təqdim etdilər və eləcə də yola saldılar. Yenə də zərbə hakimliyimizin, gənc nəslin üzərinə düşdü. Bacarıqlı, istedadlı gənclərimizin yetişməsində, üzə çıxmasında həmişə öz kadrlarımıza üstünlük verilməsini daha məqsədəuyğun saymaq olardı, nəinki bu əcnəbiləri. Bəli, De Blekere Avropada yaxşı hakim olub. Dəfələrlə onun idarə etdiyi oyunları da izləmişik. Amma yaxşı idarəçilik qabiliyyətinə malik olsaydı, yəqin ki, elə öz ölkəsində qalıb işləyərdi. Əcnəbinin bizim regionlarda hakim axtarıb tapmağa nə vaxtı, nə həvəsi, nə də halı olacaq. Ona bir heyət veriləcək və deyiləcək ki, bu da hakimərimizin bugünkü siyahısı, vəssəlam. Böyük təəssüf hissi keçirirəm. Fəqət neyləmək olar? Çempionatın başlamasına da az qalıb. Yenə güc əvvəlki heyətimizin, sonuncu mövsümdə tər tökmüş, əziyyət çəkmiş hakimlərin üzərinə düşəcək. Onlara ancaq uğur arzulaya bilərəm. Öz üzərlərində çoxlu çalışsınlar və ruhdan düşməsinlər”.