“Sumqayıt” ilk oyunda “Fehervar”ın öhdəsindən gələ bilmədi.

Murad Xaçayevin yersiz qırmızı vərəqəsi komandanı çox çətin vəziyyətə saldı. Samir Abasov mərhələni keçmək şansını 30 faizlə dəyərləndirməkdə tam haqlıdı. Bəs Mehdi Hüseynzadə adına stadiondakı, ümumiyyətlə, şəhərdəki ab-hava belə aqibəti haqq edirdimi? Qətiyyən yox! Niyə? Mən danışım, siz agah olun.

“Koroğlu”dan “gənclik şəhəri”nə...
Oyun günü saat 17.30-da “Futbol+” redaksiyasının yerləşdiyi ərazidən Sumqayıta yollandım. Belə erkən yola çıxmağım həm Bakı – Sumqayıt yolundakı məşhur tıxacdan, həm də tribunalarda gözlənilən anşlaqdan irəli gəlirdi. Düzdü, “Göyərçin”ə yaxınlaşana qədər ajiotajdan əsər-əlamət yox idi. Lakin şəhərin daxilində fəaliyyət göstərən obyektlərdə, ictimai nəqliyyat vasitələrində gedən söhbətlərə qulaq müsafiri olandan sonra ab-hava hiss olunmağa başladı. Azarkeşlərin bir qismi “Sumqayıt” çətin qələbə qazansın, “Fehervar çox güclüdü” deyirdisə, başqaları “Samir müəllim yəqin nəsə düşünüb, ilk mərhələdə dayanmaq olar?”, - deyə nikbinliyini gizlətmirdi. Hətta “Sumqayıt”ın qələbəsi üçün mərc edən tərəfdarlar da az deyildi. Onlardan biri “2:1 hesabıyla “Fehervar”ı məğlub edəcəyik. Bilirsən, nə qədər qazanacam? Pulum səkkiz dəfə artacaq!” sözləriylə dostunu da mərc etməyə çağırırdı... Stadionun girişində qonaqlara “xoş gəlmisiz!” deyib, tribunalara dəvət edən azyaşlı qızlar da var idi. Beləliklə, idman qurğusuna daxil oldum...

Media sektorundan tribunalara baxış...
Azarkeşlər yavaş-yavaş yerini aldı və oyunun başlama saatına qədər bütün tribunalar doldu. Mənzərə möhtəşəm idi. Azarkeşlər “Sumqayıt”a inamı ifadə edən şüarlarla oyuna kökləyir, rəqibi isə təzyiq altında saxlayırdı. Səbuhinin qoluyla daha da coşan azarkeşləri “qırmızı” alan Murad məyus etdi. Uzun müddət tribunalara sükut çökdü. 53-cü dəqiqədən sonra, demək olar ki, son dəqiqəyə qədər səslənən “UEFA mafiya!” şüarları isə qulaq batırırdı. Tərəfdarların 73-cü dəqiqədə meydana yad əşyalar, daha doğrusu, su şüşələri atması isə gərginliyin zirvə nöqtəsi oldu. Hər halda, Elvin Bədəlov “yox, etməyin” deyərək azarkeşləri dayandıra bildi. “Fehervar”ı 15 nəfərlik ultrası dəstəkləyirdi ki, komanda qələbəni məhz onlarla bayram etdi.

“Sumqayıt”dan narazı Sumqayıt...
Son ana qədər azı bərabərlik qolunu gözləyən azarkeşlər hakimin final fitindən sonra məğlubiyyətlə barışdı. Amma barışmaq istəmədiyi məsələləri dilə gətirənlər də az olmadı. Su ilə stadiona daxil olmaq istəyən tərəfdarların qarşısının alınması, idman qurğusunun daxilində isə 50 qəpiklik suyun 2 manata satılması çoxunun narazılığına səbəb oldu. Yeri gəlmişkən, meydançanın işıqlandırılması da lazımi səviyyədə deyildi. Görünür, ya projektorlar gücləndirilməlidi, ya da onların sayı artırılmalıdı. Ya bəlkə də “Sumqayıt” təşkilatçılıqda çox təcrübəsizdi.

Beləliklə, “Sumqayıt” azarkeşlərinə güvənərək ən ucuz bileti 5 manata satdı. Tərəfdarların komandanı tək qoymaması, tribunaları tam doldurması möhtəşəm məqamdı. Amma həmin şəxslər nə məğlubiyyətə layiq idi, nə Xaçayevin “qırmızı”sına, nə də Samir Abasovun “komandadan gedənlər aparıcı oyunçular deyildi” yalanına. Tərəfdarlar daha yaxşı nəticəni haqq edirdi!

İndi yeganə çıxış yolu toparlanaraq “Fehervar”ı mübarizədən kənarlaşdırmaq, sumqayıtlıların könlünü almaqdı. Çətin, amma mümkün missiyadı. İlk növbədə Samir Abasov qələbəyə inanmalıdı. Baş məşqçi “30 faiz” deyirsə, yetirmələrindən nə gözləyək?!

KƏNAN BAHADIR