“Neftçi”də köklü islahatların, dəyişikliklərin yaşandığı indiki yayda klubdan ayrılan futbolçulardan biri də İvan Brkiç oldu.

“Ağ-qaralar”la 2025-ci ilə qədər müqaviləsi olan xorvatiyalı qapıçı düşərgəni tərk edərək Polşaya üz tutdu. O, bundan sonra karyerasını Polşanın elita təmsilçisi “Motor”da davam etdirəcək. 29 yaşlı qolkiper “Neftçi”də forma geydiyi ilyarım ərzində azarkeşlərin də sevgisini qazanan legionerlərdən biri idi. Qəfil ayrılıq, klubdakı dəyişikliklər, yeni baş məşqçi və başqa maraq doğuran mövzular ətrafında İvanla söhbətləşdik.

- Uzun müddət Azərbaycanda yaşadın. Bu ölkəni necə xatırlayacaqsan?
- Həyatımın bu mərhələsini həmişə xatırlayacağam. Azərbaycana və ordakı bütün insanlara böyük hörmətim var.

- Burda başına gələn ən maraqlı hadisə nə oldu?
- Azərbaycan dilini öyrənmək. Mənim üçün çox maraqlı və əyləncəli idi (gülür).

- “Neftçi”yə gələndə Azərbaycan, futbolumuz haqda məlumatın var idi?
- Çox şey bilmirdim. Həmin vaxt orda olan və ya olmuş bir çox insanla söhbətləşdim. 

- Azərbaycanda futbol hansı səviyyədədi? Dostlarına bura gəlməyi tövsiyə edərdin?
- Fikrimcə, Azərbaycan futbolu ildən-ilə yaxşılaşır. Sadəcə, bütün süni ot örtüklərini dəyişməyə cəhd etməlidilər. Daha yaxşı olacaq. Bəli, tövsiyə edəcəyəm. 

- “Neftçi” karyeranı necə dəyərləndirirsən?
- Hesab edirəm ki, yaxşı idi. Çünki hamı ilə yaxşı münasibətim var. Mən bura köçəndə və bu keçid rəsmiləşəndə onların məni nə qədər çox sevdiyini gördüm. Amma bunu ilk gündən sonuncu günə qədər hiss etdim. Bununla fəxr edirəm və bunların hamısına görə sizin vasitənizlə onlara təşəkkür edirəm. 

- Klub rəhbərliyinin və komanda yoldaşlarının sənə münasibəti necə idi?
- Biz ailə kimi idik. Bu klubun bir hissəsi olduğuma görə çox xoşbəxtəm. 

- “Neftçi” ilə 2025-ci ilə qədər müqavilən var idi. Amma daha tez getdin. Belə verməyinin səbəbi nə oldu?
- “Nefçi”dəki adamlarla danışarkən yeni transferlər reallaşdığına görə limitlə bağlı problem ola biləcəyini dedilər. Mən də düşündüm və Polşadan gələn təklifə “hə” dedim. Həmçinin ekstraklasa çox yaxşı liqadı, daha da irəli getmək olar.

- Hazırda “Neftçi”də əlaqə saxladığın dostların var?
- Təbii ki, orada dostluğumun ömür boyunca davam edəcəyi qardaşlarım var.

- Mövsüm bitəndən sonra klubda köklü dəyişikliklər oldu. Səncə, bakılılar növbəti mövsümdə uğur qazanacaq?
- Əlbəttə, düşünürəm və ümid edirəm ki, qarşıdakı mövsüm “Neftçi” üçün uğurlu olacaq.  

- Klubda bir çox baş məşqçinin rəhbərliyi altında çıxış etdin. Onlardan ən yaxşısı hansı idi?
- Deyə bilərəm ki, Samir Abasov və Laurentsiu Reqekampf mənim üçün ən yaxşısı idi. Bəlkə də Reqekampf bir az da yaxşı idi. Çünki başqalarıyla müqayisədə onunla daha uzun müddət bir yerdə çalışmışam.

- Roman Qriqorçuk baş məşqçi təyin olunandan sonra sən getdin. Onun təyinatının sənin gedişinlə əlaqəsi var?
- Xeyr, mən onun haqqında yaxşı düşünürəm və ona hər şeyin ən yaxşısını arzulayıram. Ona dedim ki, bu anda ayrıldığıma görə kədərlənirəm. Çünki onun “Nefçi” ilə çox yaxşı iş görəcəyinə inanıram.

- Son mövsüm “Neftçi” üçün uğursuz oldu. Bunun səbəbi nə oldu, nə baş verdi?
- Bir il ərzində çoxlu dəyişiklik baş verdi. “Neftçi” kimi böyük klub üçün belə hadisələrin yaşanması yaxşı deyil. Bərbad mövsümdən sonra ev yerdən damına kimi tikilir. Düşünürəm ki, indi düzgün istiqamətdə gedirlər və harda səhv etdiklərini anlayıblar.

- Burda çıxış edərkən ən çətin rəqibiniz hansı komandalar idi? “Qarabağ”, “Zirə”, “Sabah”, yoxsa başqası?
- Bəli, həmin üç komandanı deyə bilərəm.

- Həmin klublardan birində oynamaq istərdin? Yəni təklif göndərsələr, Azərbaycana qayıdarsın?
- Azərbaycanda ancaq “Neftçi” üçün oynamaq istərdim. Orda özümü çox gözəl hiss edirdim. Mənlə yanaşı, ailəm də oranı çox sevir.

- “Neftçi” azarkeşlərinə nə demək istəyərdin?
- Azarkeş sevgisi mənim üçün böyük şərəf və ləzzətdi. Mən də onları sevirəm və indi hamımız birlikdə “Neftçi”yə dəstək olacağıq. Uğurlar! 

KAMAL SƏFƏR