“Sadəcə, ona məşqçi kimi klubda işləməyi təklif etdim” - Azər Həşimovdan ayrılıq şərhi
Ötən mövsüm “Qaradağ Lökbatan”ın heyətində forma geyən Novruz Məmmədov komandadan ayrılıb.
“Football-plus.az” xəbər verir ki, Məmmədova klubda məşqçi kimi qalmaq təklif olunsa da, razılaşmayıb. Bilindiyi kimi, Novruz komandada futbolçu kimi oynamaqdan savayı həm də köməkçi məşqçi kimi fəaliyyət göstərirdi. Lökbatan təmsilçisinin baş məşqçisi Azər Həşimovun həm yanındakı, həm də meydandakı əsas nümayəndəsiydi desək, yəqin ki, yanılmarıq. Baş məşqçiylə münasibətləri bu qədər yaxşı olan Məmmədovun klubdan ayrılmaq istəyi maraq doğurdu. Görəsən, Məmmədovla Həşimovun arasında narazılıq olubmu? Yoxsa klubda istədiyi diqqəti görən biri niyə oranı tərk etsin? Məsələylə bağlı fikirlərini öyrənmək üçün Həşimovla əlaqə saxladıq:
“Novruz Məmmədovun klubla birillik müqaviləsi var idi və zamanı bitdi. Novruz həm məşqçi, həm də oyunçu kimi komandaya kömək edirdi. Aramızda heç bir narazılıq yoxdu. Sadəcə, ona məşqçi kimi klubda işləməyi təklif etdim. O da 2-ci liqadan təklifi olduğunu və orda oynamaq istədiyini bildirdi. Bunu normal qarşıladım. Novruz balaca qardaşımdı və ona futbolçu karyerasında uğurlar arzulayıram. Aramızda heç bir problem yoxdu. Artıq bir yerdə olmasaq da, əlaqələrimiz var”.
KAMAL SƏFƏR
Digər xəbərlər
