“Qaradağ Lökbatan” yeni baş məşqçisinə qovuşdu
Birinci divizionda çıxış edən “Qaradağ Lökbatan”da baş məşqçi təyinatı olub.
Yanvarın əvvəlində qəsəbə təmsilçisinin “sükanı arxasına” Araz Bağırovun keçəcəyi söylənilsə də, rəhbərlik Azər Haşımovla anlaşıb. Xatırladaq ki, Haşımov cari mövsümün gedişində uğursuz nəticələrə görə “Mingəçevir”dən ayrılmışdı. Hazırda A kateqoriyalı kurslarda iştirak edən məşqçi ilə əlaqə saxlayıb, təyinatına münasibət öyrəndik:
“Bir neçə gün öncə “Qaradağ Lökbatan” rəhbərliyindən əlaqə saxladılar. Fikrilərini söyləyib görüşmək istədiklərini bildirdilər. Rəhbərliklə müzakirələr zamanı fikirlərimiz üst-üstə düşdüyündən razılıq əldə olundu. Yaxın günlərdə “6 ay+1 il” şərti ilə müqaviləyə imza atacam. Məşqçilər korpusunda dəyişiklik olmayacaq. Səbuhi Bayramov və Ruzi Qiyaslı ilə yola davam edəcəyik”.
Lökbatan təmsilçisinin baş məşqçisi fasilə dönəmində düşərgəyə iki yeni futbolçu dəvət etdiklərini də söylədi:
“Transfer çalışmaları, demək olar ki, başa çatıb. Fasilədə komandaya iki yeni gənc oyunçu dəvət etmişik. Hələ tam hazır olmasalar da, vaxt ötdükcə formaya düşəcəklər”.
Qeyd etdiyimiz kimi Azər bəy hazırda A kateqoriyası almaq üçün məşqçi kurslarına qatılıb. Bu səbəbdən o “Qəbələ”nin U-16 komandasını çalışdırırdı. 38 yaşlı mütəxəssis bizimlə söhbətdə artıq bölgə təmsilçisindən ayrıldığını dedi:
“Bildiyiniz kimi, kursa qatılan hər bir məşqçi hansısa klubda komanda çalışdırmalıdı. Mən də qeyri-rəsmi “Qəbələ”nin U-16-da idim. “Qaradağ Lökbatan”dan təklif gələndən sonra ordan ayrıldım”.
RƏŞAD
