Nəhayət, “Qarabağ” Şahruddin Məhəmmədəliyevi transfer etdiyini açıqladı.

Bilindiyi kimi, bununla daha bir sabiq futbolçusunu qaytaran Ağdam təmsilçisi Musa Qurbanlını da gətirib. Hələ alınmayan Kadi cəhdi də xatirimizdədi. Bəli, azarkeşlər Şahruddinlə Musanın keçidinə qarşı idilərsə, Borgesi bağırlarına basacaqdılar. Lakin bəxt onların üzünə gülmədi. Hadisələr istəklərin əleyhinə cərəyan etdi.

“Qarabağ” yeni mövsümdən etibarən, çox güman, “Azərsun Arena”da çıxış edəcək. Stadionda təmir-bərpa işlərinin aparıldığını bilirik. “Futbol ili”nin hədəfləri də yenidi. “Köhlən atlar” bu dəfə avrokuboklarda daha irəli getmək niyyətindədi. Yeni formalar da öz yerində. Baxmayaraq ki, ağ-mavi geyimlər Argentina millisini xatırladır. Bəlkə elə bu formaları geyən Olavio Juninyo, Musa Qurbanlı və Nəriman Axundzadə həm də oyun tərziylə Lionel Messini, Anxel Di Mariyanı, Paulo Dibalanı xatırladacaq? Şahruddin də Emiliano Martinesi... Bir də gördün “Şah” da azarkeşlərdən “penalti canavarı” ləqəbi aldı... Martines kimi...

Əslində Şahruddinin qayıdışının məcburi addım olduğu gün kimi aydındı. Ona görə ki, zədəli Amin Ramazanovu əvəzləyəcək yerli və keyfiyyətli qolkiper lazım idi. Belədə ağla ondan başqası gəlmir. Həm də anlaşmanın müddəti bir ildi. Çox güman, “Qarabağ” o vaxta qədər Sadiq Məmmədzadə və yolu gözlənilən İbrahim Ramazanov kimi gənc qolkiperləri yetişdirə bilər.

Qısası, xeyirli olsun, “Qarabağ”. Baş məşqçi Qurban Qurbanovun təcrübəsini və heyətdə ayrılıq baxımından ciddi dəyişikliyin olmadığını nəzərə alsaq, avrokuboklar üçün ümidli olmağa məcburuq!

KƏNAN BAHADIR