Məlum olduğu kimi, Misli premyer-liqasında yeni mövsümün başlamasına üç həftədən az qalır.

Klublar hazırda heyəti komplektləşdirməyə çalışır. Ciddi dəyişikliyə məruz qalan klublardan biri də “Kəpəz”di. Gəncə təmsilçisi maliyyə problemi üzündən bir neçə əsas oyunçusunu itirmək məcburiyyətində qaldı. Lakin ötənilki heyətin üzvlərindən də qalan oldu ki, bunlardan biri də Ehtiram Şahverdiyevdi. 27 yaşlı futbolçu ötən ildə qoşulduğu “sarı-göylər”in uğurları üçün daha bir il çalışacaq. O, komandasıyla bağlı suallarımızı cavabladı.

- “Kəpəz”lə yeni müqavilə imzaladın. Başqa təkliflərin vardımı, niyə məhz “Kəpəz”?
- Açığı, real təklifləryox idi. Bir-iki komanda ilə danışıq aparırdım. “Kəpəz” məni daha çox istədiyi üçün burda qalmağı seçdim.

- Artıq ikinci mövsümdə “Kəpəz”də çıxış edəcəksən. Geridə qalan bir ildə komandan maddi sıxıntılarla üzləşdi. Belə problemlərin olması səndə narahatlıq yaratmadımı?
- Düzdü, klubun sponsoru yoxdu. Amma yaxşı kollektiv olub, istədiyimiz nəticələri qazanacağıq. Bizim işimiz meydandadı.

- Bir neçə oyunçu düşərgəni tərk etdi, ayrı-ayrı premyer-liqa klublarına keçdi. Səni burda qalmağa vadar edən nə oldu? 
- Bəli, bir neçə futbolçumuz komandadan getdi. Amma əvəzedilməz oyunçu yoxdu. Ümid edirəm ki, gələnlər onları layiqincə əvəz edəcək. Burda qalmağımın səbəbi isə Adil Şükürovun məni komandasında görmək istəyi oldu.

- Gələn mövsüm meydanda necə “Kəpəz” görəcəyik? Reallıqla danışsaq, klub yenə elitada qalmaq uğrunda mübarizə aparacaq?
- Bəli, hədəfimiz premyer-liqada qalmaq olacaq. Ümidvaram ki, sponsor gələr və biz də yuxarı pillələr uğrunda mübarizə apararıq.

- “Qəbələ”nin yetirməsisən. İndi isə “Kəpəz”də forma geyirsən. Bir futbolçu kimi hədəflərinə nə dərəcədə çamısan və ya hədəflərin nədi?
- Əvvəlcə bildirim ki, “Qəbələ”nin aşağı dəstədə oynamasını görmək mənim üçün çox üzücüdü. Bu klub Azərbaycan çempionatına daim rəng qatıblar. Uğurlar arzulayıram və ümid edirəm ki, yenidən əsas liqaya dönəcəklər. Hər futbolçunun ayrıca hədəfi olur. Mən isə fərdi məşqlər edir, çalışıram ki, milli  komandanın formasını geyim.

- Komandanın yeni mövsümə hazırlığı necə gedir? Ölkə xaricində hazırlıq keçməməyiniz problem deyil?
- Hər şey qaydasındadı. Təlim-məşq toplanışının harda keçirilməsindən aslı olmayaraq, çempionat başlayana qədər maksimum dərəcədə hazır olmağa çalışacağıq.

- “Turan Tovuz”la yoxlama oyununda 0:4 uduzduz.
- Adından da bəlli olduğu kimi, yoxlama oyunu idi. Məşqçimiz hər kəsə, xüsusilə də gənc oyunçulara şans verdi. Baxmayaraq ki, məğlub olduq, bunun bizə xeyri olacaq.

- Gəncəli azarkeşlərə nə demək istəyirsən?
- Azarkeşlərimizə sizin vasitənizlə təşəkkür edirəm. Həmişə yanımızda oldular. Onları yenə yanımızda görmək istəyirik. Göstərdiyiniz dəstəyi bizdən əsirgəməyin. Biz də ümidləri doğrultmağa çalışacağıq.

RÖYANƏ OĞUZ