Adil Şükürov Amil Yunanovu aldadıb? – iddia
Bir müddət öncə Amil Yunanovun “Kəpəz”dən hələ də rəsmi təklif almadığını xəbər vermişdik.
“Səbail” i tərk edib Gəncəyə yollanan oyunçunun transferi ilə bağlı bəzi detallar ortaya çıxıb. Etibarlı mənbədən əldə etdiyimiz məlumata görə, Gəncə klubu futbolçuya son mərhələyə qədər fərqli vədlər verib. Belə ki, “sarı-göylər” Yunanovla qış fasiləsində başqa şərtlər ilə anlaşıb. Amil İlqar Nadiri ilə Adil Şükürovun çağırışındakı təkidi görüb, masa arxasına keçir. Amma şərti belə olur: “6 ay +1 il”. Həm də futbolçu nə az, nə çox - 6 min manat tələb edir. Premyer-liqanı tərk eləmək təhlükəsi altında olan gəncəlilər isə hər şeyə “hə” deyir. Amma Yunanovu “qoy “Kəpəz” premyer-liqada qalsın, sponsorumuz da gəlsin, istədiyin kimi olacaq” fikri ilə razı salırlar. Amil isə “onsuz da “Səbail”də ehtiyatda otururam, həm də Şahin Diniyev məni istəmir, gedim Şükürovun yanına” düşüncəsini üstün tutub, böyük ümidlərlə yollanır Gəncəyə. Ötən mövsümün sonuna yaxın kimin gedib-getməyəcəyi müzakirəyə çıxarılanda Amil baş məşqçidən söz verilmiş müqaviləni soruşur. Aldığı “gözlə” cavabından sonra isə “Səbail” dən imtina edir və ora ilə bağlarını birdəfəlik qırır. Gəncə klubunun rəsmiləri hücumçunu inandırır ki, yaxın zamanlarda onunla müqavilə imzalanacaq, amma gözləməlidi. Adil Şükürov isə deyir ki, “mən onsuz da komandada qalmayacam, sən də qalma”. Sonradan Şükürovun klubda qalacağı dəqiqləşir. Aradan çox keçmir ki, planlar dəyişir. Futbolçuya 2500 manat məbləğ təklif edilsə də, o, “3000 edin, oynayım” cavabını verir. Baş məşqçisinin məsələni həll edəcəyini düşünərək gözləməyi üstün tutur. İlin əvvəlində deyilən məbləğdən iki dəfə azını verməyə belə razılaşmayan Gəncə tərəfi inadından əl çəkmək istəmir. Amil isə Gəncədə yaşamağın çətinliyini dilə gətirərək, Bakıdakı rahat düzəni pozulduğuna görə klubdan maaş artımı gözləyir. Amma istədiyi kimi olmur. İddialara görə Şükürovun da maaşı 6 min manat idisə, indi 11 min manata qalxıb. Kimin kim tərəfindən aldadıldığı, yəni söz sahibinin Şükürov, yoxsa Nadiri olduğu sual altındadı. Reallıq isə budu ki, forvard hazırda toplanışı davam etdirən “Kəpəz”ə hələ də qoşulmayıb.
Dünən bir daha Yunanovla əlaqə saxladıq:
“Bu məsələ yarımçıq qalıb. Heç bir xəbər də yoxdu, gözləyirəm. Amma başqa çarə də görünmür. Əlavə real təklif də almamışam. Artıq çempionatın başlamasına 20 gün qalıb, fərqindəyəm. Özüm fərdi məşqlər edirəm. Çalışıram formada qalım. Klubdan cavab gözləyirəm”.
Amillə bağlı fikirlərini öyrənmək üçün Adil Şükürova da sual ünvanladıq. Onun “Football-plus.az”a söylədikləri:
“Amil bizim seçib, bəyəndiyimiz futbolçulardandı. “Kəpəz”də qalmasını çox istəyirdik. Amma bizim maddi vəziyyətimiz dəyişdi, sponsorumuz da yoxdu. Üstəlik əlavə vergi borclarımız var. İstədiyi məbləğ bu kimi səbəblər üzündən bizə uyğun gəlmir. Buna görə Amillə yollarımızı ayırdıq. Ona gələcək karyerasında uğurlar arzulayıram”.
RÖYANƏ OĞUZ
Digər xəbərlər
