Bu gün “Zirə” Moldovada yerli “Şerif”lə qarşılaşmaqla Azərbaycan klubları və azarkeşlər üçün avrokuboklar mövsümünü açacaq.

Rəqibin bizə o qədər də yad olmaması “Zirə”nin xeyrinə sayılacaq amillər sırasındadı. “Şerif”i yaxşı tanımaq bizi ümidləndirib. Ən azı ona görə ki, “Qarabağ” indiyə qədər bir neçə dəfə Moldova təmsilçisiylə qarşılaşıb və bütün hallarda sonda sevinən tərəf biz olmuşuq. Bəli, “Zirə” ilə “Qarabağ”ı müqayisə etmək çətindi. “Köhlən atlar” çoxdan Azərbaycan səviyyəsini aşıb, Avropanın tanınmış klublarına belə başağrısı ola biləcək gücdədi. Heç də təsadüfi deyil ki, Qurban Qurbanovun çalışdırdığı komanda artıq dünya reytinqində də irəliləməyi bacarır. Beynəlxalq Futbol Tarixi və Statistikası Federasiyası yaxınlarda açıqladığı reytinq cədvəlində Azərbaycan çempionunu 39-cu sıraya layiq bilib. Bizim üçün yetərincə qürurlandırıcı məqamdı.

Bütün bunları nəzərə alanda Azərbaycanın heç bir klubunun hazırda “Qarabağ”la müqayisə oluna bilməyəcəyini anlayırıq. Amma bu məqam özü belə “Zirə”nin “Şerif” qarşısında şanslarını əhəmiyyətli dərəcədə azalda bilməz. Birincisi ona görə ki, “Zirə” son mövsümdə “Qarabağ”a yetərincə layiqli rəqabət təklif edə bildi. Qəsəbə komandası kubokun finalında “Qarabağ”la başabaş oynamağı, bərabərlik qolunu vurmağı bacardı. Sonda səviyyə fərqi özünü göstərsə belə, final rəqabət şəraitində keçdi, “Zirə” adlı-sanlı rəqibindan çox da geri qalmadı. Digər tərəfdən də mövsüm ərzində Rəşad Sadıqovun komandasının gücünü gördük. Heç də təsadüfi deyil ki, gümüş medallar məhz “Zirə”yə qismət oldu, qəsəbə təmsilçisi “Qarabağ”ın ən yaxın izləyicisi kimi mövsümü bitirməyi bacardı. Bu fakt özü də “Zirə” haqqında xoş düşüncədə olmağa, komandanın gücünə ümid bəsləməyə imkan verir.

Avropa Liqasının 1-ci təsnifat mərhələsi çərçivəsində “Şerif”ə qarşı oyunlarda iştirak etmək üçün adları təqdim edilən futbolçuların siyahısına baxanda heyətdə böyük dəyişikliklər olmadığını görürük. Gedənlərin sırasında daha çox Rəhim Sadıxovun adı diqqət cəlb edir. Amma “Sumqayıt”dan gəlib, elə “Sumqayıt”a da qayıdan “milliləşdirilmiş” futbolçunun yerini doldurmaq Rəşad Sadıqov üçün elə də çətin olmamalıdı. Çünki Sadıxov onsuz da əsas heyətdə daim çıxış etmirdi, ümumi ansambıldan geri qaldığını tez-tez görürdük. Ümumilikdə Rəhimin “Zirə”yə gözlənilən qədər fayda vermədiyini deyə bilərik. Onun istedadlı futbolçu olduğunu inkar etmirəm, amma bu istedad “Zirə”də parlamadı. “Zirə”dən ayrılan kimi Ermənistan klubu ilə anlaşan ukraynalı Vladislav Kulaçı da elə Rəhim kimi ciddi itki saymaya bilərik. Əvəzində “Kəpəz”dən yaxşı tanıdığımız Junior Martins “Zirə”nin hücum xəttinə həm güc, həm də rəngarənglik qatmağı bacaracaq. Eləcə də “Sabah”da heç cür özünü göstərə bilməyən Davit Volkov “yuva”ya dönüb. “Qəbələ”dən “Zirə”yə yollanan gürcü Rəşad Sadıqovun yanında öz oyununu tapmışdı, bizim premyer-liqanın ən yaxşı legionerlərindən biri idi. Bu mənada onun daha yaxşı məvacib qarşılığında “Sabah”a yollanması da bizi təəccübləndirməmişdi. Görünən o oldu ki, Volkov üçün “Zirə”də oynamaq daha rahatdı.

İndiyə qədər üç dəfə “Qarabağ”a rəqib olan və heç birində mərhələ adlaya bilməyən “Şerif” “Zirə” ilə görüşlərdə də eyni aqibəti yaşaya bilər. Söhbət heç də təkcə “Zirə”nin artan gücündən, yaxud da Azərbaycan klubları ilə duellərdə moldovalıların bəxtinin gətirməməsindən getmir. “Şerif” də əvvəlki gücündə deyil. Komandanın öz ölkəsində çempionluğu əldən verməsi heç də sıradan məqam sayılmamalıdı. Hətta başa çatan mövsümdən sonra “Şerif”i səkkiz futbolçu tərk edib. Bu da heyətda müəyyən boşluqların olacağına, komplektləşmədə və qarşılıqlı anlaşmada problem yaşana biləcəyinə işarədi.

Heç şübhə etmirəm ki, Rəşad Sadıqov rəqibi yetərincə öyrənməyi, “Zirə”ni bu sınağa yaxşı hazırlaşdırmağı bacarıb. Sadıqov üçün “Zirə” ilə avrokuboklarda debüt uğursuz olmuşdu, püşk ilk mərhələdəcə komandanın qarşısına adlı-sanlı “Makkabi”ni çıxarmışdı. İndi həm rəqib nisbətən əlverişlidi, həm də Sadıqovlu “Zirə” daha çox təcrübə yığıb. Deməli, avrokubokların Azərbaycan futbolu üçün uğurlu startla yadda qalacağına inanmağa dəyər.

AMAL ABUŞOV